ئەم پەڕەیە چاپ بکە

بەهۆی شەڕی توركیا و پەكەكە لە مێرگسۆر هاووڵاتیەك شەهید بوو و لە سیدەكانیش كارەبای چەند گوندێك پچڕا

بەهۆی شەڕی توركیا و پەكەكە لە شارەدێی شێروان مەزن لە سنووری شارۆچكەی مێرگەسۆر پێشمەرگەیەكی خانەنشین شەهید بوو. لە سیدەكانیش كارەبای چەند گوندێك پچڕا. لە ئامێدیش فڕۆكەیەكی بێ فڕۆكەوانی توركیا كەوتە خوارەوە، بەو هۆیەوە ترس و دڵەڕاوكێ لای دانیشتوانانی ئەو ناوچانە پەیدابووە و داوا لەو دوو هێزە دەكەن شەڕی خۆیان لە گوندەكانی ئەوان دوور بخەنەوە.

كۆڤان ڕەشید، بەڕێوەبەری شارەدێی شێروان مەزن سەر بە شارۆچكەی مێرگەسۆر بۆ "هەولێر" دیاركرد:" هاووڵاتیەكی گوندی پێندرۆ بەناوی لازم عەلی، كە تەمەن 60 ساڵە لە ئەنجامی شەڕی نێوان پەكەكە و سوپای توركیا شەهید دەبێت، كە ئەو هاووڵاتیە بۆ كۆكردنەوەی گژوگیای بەهارە رووی لە ناوچەكە كردبوو.
دەشڵێ:" داوا لە هاووڵاتیان دەكەین بە هیچ شێوەیەك سەردانی ئەو شوێنانە نەكەن، بۆ ئەوەی نەبنە قوربانی شەڕی نێوان پەكەكە و توركیا.
لازم عەلی فەقۆ خەڵكی گوندی پێندرۆ بووە، پێشمەرگەی خانەنشین بووە و بە مەبەستی كۆكردنەوەی گژوگیای بەهارە چووەتە ئەو ناوچەیە.
لەلایەكی دیكەوە فڕۆكە جەنگییەكانی توركیا بۆردوومانی چەند گوندێكی سنووری شارەدێی سیدەكانی سەر بە شارۆچكەی سۆرانیان كرد و شەڕ و پێكدادان لەنێوان توركیا و گەریلاكانی پەكەكە روویدا، بەو هۆیەوە تەزووی كارەبای گوندەكانی كۆلیت، دەراو، بێركمە و ژیلیا پچڕا و ترس و دڵەڕاوكێ لای هاووڵاتیان دروست بووە و داوا دەكەن پەكەكە بنكە و بارەگاكانی خۆی لە گوندەكان دووربخاتەوە و توركیاش چی دیكە ناوچەكانی ئێمە بۆردومان نەكات.
لە گوندی بەرێ لە سنووری شارۆچكەی ئامێدی فڕۆكەیەكی بێ فڕۆكەوانی وڵاتی توركیا كەوتە خوارەوە، دواتر فڕۆكەیەكی دیكە ئەو شوێنەی بە سەختی بۆردوومان كرد".
شایانی باسە لە سنووری سۆران كە شارەدێی سیدەكان سەر بەو شارۆچكەیە، لەگەڵ سنووری هەر دوو شارۆچكەی مێرگەسۆر و ئامێدی زیاتر لە 300 گوند چۆڵكراون و خەڵكەكە لەبەر پەكەكە و توركیا ناوێرن بگەڕێنەوە سەر گوندەكانیان و ئاوەدان بكەنەوە، هاووڵاتیانی ئەو گوندانە داواكارن لە پەكەكە بنكەوبارەگاكانی خۆیان لە گوندەكان دوور بخەنەوە و بچنە شوێنی خەباتی خۆیان كە باكووری كوردستانە، داواش لە توركیا دەكەن چی دیكە بە بیانۆی هەبوونی بنكە و بارەگاكانی پەكەكە ناوچەكانی ئەوان بۆردومان نەكەن، بۆ ئەوەی چی دیكە خەڵكی ئێمە نەبێتە قوربانی و ئێمەش بتوانین بگەڕێینەوە سەر گوند و ئاوایەكانی خۆمان".

 

ڕائیب جادر ـ هەولێر