تشرینی یەکەم 16, 2019

عەلی هالۆ:تا ئێستا لە عەفرین 166 كەسی مەدەنی شەهید و 450 كەسیش بریندار بوونە

لە چەند ڕۆژی ڕابردوودا شاندێكی پەرلەمانی كوردستان، كە لە نوێنەری زۆرینەی فراكسیۆنەكان پێكهاتبوون سەردانی عەفرینی كرد بۆ پشتگیریكردنی پەرلەمانی كوردستان بۆ ئەو شارە و گەیاندنی بڕێك هاوكاریی حكوومەتی هەرێم بۆ ئەوان. عەلی هالۆ، نوێنەری فراكسیۆنی زەرد لە شاندی پەرلەمان بۆ عەفرین لە چاوپێكەوتنێكدا لەگەڵ "هەولێر" دەڵێت، پشتیوانی خەڵكی باشوری كوردستانمان گەیاندە عەفرینییەكان، ڕاپۆرتێكی تێروتەسەلمان لەبارەی دۆخی عەفرین ئامادە كردووە و داوا لە پەرلەمان دەكەین كۆبوونەوەیەكی تایبەت بە دۆخی عەفرین ئەنجام بدات، جگە لەوەش پەیامی عەفرین دەگەینینە نوێنەری هەموو وڵاتان و نەتەوە یەكگرتووەكان.

* بۆچی سەردانی عەفرینتان كرد؟
- ئێمە بە ئەركی خۆمان زانی، ئەركێكی مرۆڤایەتی، نەتەوەیی، ئەغلاقی و نیشتمانی زانی كە بە هاواری خوشك و برایانی خۆمان لە عەفرینەوە بچین، كە ئەوە نزیكەی مانگێكە لەژێر بۆردوومانی فڕۆكەكان و تۆپ و تانكەكانی توركیا دایە، شەڕێكی ناڕەوا و نەیاسایی بەرامبەر بە عەفرین دەكرێت، هەم وەكو مرۆڤ، هەم وەكو كورد ئەركی ئێمە بوو وەكو نوێنەری خەڵكی باشووری كوردستان بە دەنگ خەڵكی خۆمانەوە بچین و رووی ڕاستەقینەی خەڵكی عەفرین بۆ خەڵكی هەرێمی كوردستان، بە كۆمەڵگەی نێودەوڵەتی رابگەینین و ئەو داتا و زانیاریانەی كە لەبەر دەستی ئێمەدان ئێش و ئازار و داخوازی و هاواری خەڵكی عەفرین بگەینینە هەموو مرۆڤ دۆستەكانی جیهان.

* عەفرینتان چۆن بینی؟
- ڕاستەوخۆ سەرجەم ئەو رووداوانەمان بینی كە لەوێ دەگوزەرێن، سەردانی نەخۆشخانەكانی عەفرین و ئەو شوێنانەمان كرد كە تۆپباران دەكرێن، هاوكات بەشداریمان لە ناشتنی تەرمی شەهیدەكان كرد، عەفرین زیانێكی زۆری بەركەوتووە، بە پێی ئەو ئامارەی كە لەبەر دەستی ئێمەدایە جگە لە شەهید بوونی شەڕڤانان و بریندار بوونی زیاتر لە 450 كەس، تا ئێستا 166 كەسی مەدەنی شەهید بوونە، هەروەها زیانێكی زۆر بەر گوندەكان و ڕەز و باغی هاووڵاتیان كەوتووە، زیانە ماددییەكان گەلێك زۆرن و گوندەكانی سەر سنوور زۆر زیانیان پێ گەیشتووە و ژمارەیەكی زۆری ئاژەڵیش لەناو بردراون، بەڵام شاری عەفرین ناكەوێت و سەردەكەوێت، چونكە خەڵكی عەفرین باوەڕیان بە خۆ هەیە، چۆن زەیتوونەكانی عەفرین ڕەگەكانیان بە خاكدا چووەتە خوار و لە عەفرین جیا ناكرێنەوە بەردەوام كەسكن، خەڵكی عەفرینیش بەردەوام بەو خاكەوە گرێدراون و مان و مانەوەیان بەو خاكەوە گرێدراوە و سەركەوتن بۆ خەڵكی عەفرین و كوردستان دەبێت، چونكە دۆزێكی ڕەوایان هەیە و خاوەن بڕیار و ئیرادەن.
* خەڵكی رۆژئاوا چۆن پێشوازیان لە ئێوە كرد؟
- عەفرین شارێكی جوان و شۆخ و شەنگە، شارێكە تێكڕا كەسك و جوانە، هەموو زەیتوون و ڕەز و باغە، خەڵكی عەفرین زۆر دڵسۆزن، مرۆڤ دۆست و میوانپەروەرن، ئازادیخواز و ئاشتیخوازن، پێشوازیەكی زۆر گەرم لە ئێمە كرا، ناتوانم بە زمان ئەو پێشوازییە گەرمە دەرببڕم، من وا بیرم دەكردەوە كە شارێك لەژێر تۆپ و فڕۆكەی جەنگی دابێت دەبێت چۆن بێت، بەڵام كاتێك ئێمە گەیشتین بەتایبەتی لە مەیدانی شەهیدان بە هەزاران كەس بە دروشمی یەكگرتنی كورد، بە گۆڤەند و خۆشی پێشوازییان لە ئێمە كرد.

* دەتانەوێت بۆ عەفرین چی بكەن؟
- ئێمە بە نوێنەرایەتی خەڵكی كوردستان و پەرلەمانی كوردستان چووینە شاری عەفرین، ئێمە نوێنەرایەتی پەرلەمان و خەڵكی عەفرین دەكەین، چونكە عەفرین شارێكی دۆرپێچ كراوە و لەژێر هێرشێكی گەورەدایە و رۆژانە بۆردوومان و تۆپباران دەكرێت، ڕاپۆرتێكمان لەبارەی دۆخی عەفرین ئامادە كردووە و ڕاپۆرتەكە ئاراستەی سەرۆكایەتیی پەرلەمان دەكەین، بۆ ئەوەی كۆبوونەوەیەكی تایبەت لەبارەی دۆخی عەفرین ئەنجام بدات، چونكە ئێمە لە ڕاپۆرتی خۆماندا ئاماری باشمان دەست كەوتووە لەبارەی شەهید و برینداركردنی هاووڵاتییانی سڤیل و خراپكردنی گوند و وێرانكردنی شوێنی مێژوویی و سووتاندنی ڕەز و باغی ئەو سنوورە، ئەو پێشنیارانە هیوادارین ببنە بڕیار و ڕاسپاردە، دەنگی خەڵكی عەفرین دەگەینینە كۆمەڵگەی نێودەوڵەتی، ڕێكخراوە خێرخوازییەكان، نوێنەری وڵاتان لە هەرێمی كوردستان، ئەوەی لە دەستی ئێمە بێت دەكەین، دەبینە پردێك لە نێوان عەفرین و كۆمەڵگەی نێودەوڵەتی.

* خەڵكی عەفرین چی پێویستە؟
- تا ئێستا هیچ ڕێكخراوێكی مافی مرۆڤ و خێرخوازی هاوكاری خەڵكی عەفرینیان نەكردووە، هەتا هیچ كام لەم ڕێكخراوانە لەم شارە بوونیان نیە، خەڵكی عەفرین پێویستی بە هەموو شتێك هەیە، پێویستی بە خواردن و خواردنەوە و پێداویستی پزیشكی هەیە، هیوادارم خەڵكی كوردستان 24 كاتژمێر لەسەر پێییەكانی خۆیان بن و هەڵوێست وەربگرن و فشار بخەنە سەر ئەو وڵاتانەی كە تا ئێستا بێ دەنگن، بۆ ئەوەی بێ دەنگی خۆیان بشكێنن و بێنە سەر خەت و بەدەم خەڵكی عەفرینەوە بچن و ئەو شەڕەی كە هەیە ڕابگرن، هەروەها داوا لە حكوومەت و لایەنەكان دەكەین هاوكاریی عەفرین بكەن، چونكە عەفرین پێویستی بە هاوكاریی مرۆیی و هەڵوێستی نیشتمانی هەیە، جگە لەوەش لەگەڵ نەتەوە یەكگرتووەكان دادەنیشین و سەردانی كونسوڵخانەكانیش دەكەین و پەیامی عەفرینیان پێ دەگەینین".

 

ڕائیب جادر ـ سۆران

© 2017 Hawler