ئەم پەڕەیە چاپ بکە

پارتی لیستی زۆرینه‌ی لایه‌نه‌ كوردییه‌كانه‌ و ڕۆڵی یه‌كلاكه‌ره‌وه‌ی هه‌یه‌

سەرۆكی ئەنجوومەنی پارێزگای نەینەوا ڕایگەیا‌ند، هەموو ئەو كەسانەی مەرجی خۆپاڵاوتن بۆ پارێزگاری نەینەوا دەیانگرێتەوە، دەتوانن ناوی خۆیان بۆ پۆستی پارێزگار پێشكەش بە ئەنجوومەنی پارێزگای نەینەوا بكەن. بەرپرسی لقی 14ی پارتی دەڵێ، هەر پارێزگارێك بەبێ پارتی هەڵبژێردرێت سەركەوتوو نابێت و هەڵوێستی توندمان دەبێت.

سەیدۆ چەتۆ، سەرۆكی ئەنجومەنی پارێزگای نەینەوا لە كونگرەیەكی ڕۆژنامەوانیدا بۆ دەزگاكانی ڕاگەیاندن، دەرگای خۆپاڵاوتنی بۆ پۆستی پارێزگاری نەینەوا كردەوە و ڕایگەیاند: "بەهۆی بەتاڵبوونی پۆستی پارێزگاری نەینەوا دوای لادانی پارێزگار لە لایەن ئەنجوومەنی نوێنەرانی عێراقەوە لە 24-3-2019 و‌، بە پشتبەستن بە حوكمی بڕگەی (5)ی بەندی (8)ی ماددەی (7)ی یاسای ئەنجوومەنی پارێزگاكانی نەبەستراو بە هەرێمەوە، ژمارە 21ی ساڵی 2008ی هەمواركراو، ئەنجومەنی پارێزگای نەینەوا ڕایدەگەیەنێت، دەرگای خۆپاڵاوتن بۆ پۆستی پارێزگاری نەینەوا تا كۆتایی دەوامی فەرمیی ڕۆژی چوارشەممە،‌ ڕێكەوتی 24-4-2019 بەپێی مەرجی دیاریكراو لە ماددەی (25)ی ‌یاسای باسكراودا كراوە و ‌دەبێت.
سەیدۆ، لە كۆنگرە ڕۆژنامەوانییەكەدا گوتیشی: "ئەوەی لە ‌توانایدایە،‌ ‌دەتوانێ لە ماوەی دیاریكراوی سەرەوەداC.V ی خۆی پێشكەش بە ئەنجومەنی پارێزگا بكات.
سەبارەت بە مەرجەكانی پاڵێوراوان بۆ پۆستی پارێزگاریش، سەیدۆ ڕوونی كردەوە: "پاڵێوراو بۆ پۆستی پارێزگاری نەینەوا سەرەڕای مەرجەكانی خۆپاڵاوتن بۆ ئەندامەتیی ئەنجوومەن، پێویستە خاوەنی بڕوانامەی زانكۆ بێت و توانای بەڕێوەبردنی كاری ئیداریی هەبێت و شارەزای ‌كارەكەیشی ‌بێت، بۆ ماوەی 10 ساڵیش لە ڕووی ئابووری و كۆمەڵایەتی و ژینگەوە توانای بەڕێوەبردنی پارێزگای هەبێت، لەگەڵ هەمووی ئەو مەرجانەی لە ماددەی (7)ی یاسای ئەنجومەنی پارێزگاكان و قەزاكان، ژمارە 12ی ساڵی 2008دا هاتوون."
پارتی دیموكراتی كوردستان كە لە نێوان لایەنە كوردییەكان گەورەترین قەبارەی لە ئەنجوومەنی پارێزگای نەینەوا هەیە‌، جەخت دەكاتەوە، ئەوان مەرجیان بۆ دەستنیشانكردنی پارێزگارێكی نوێ بۆ ئەو شارە هەیە.
لەمبارەیەوە عەلی خەلیل، بەرپرسی لقی 14ی پارتی دیموكراتی كوردستان لە نەینەوا دەڵێت: پارتی مەرجی بۆ پارێزگاری نوێ هەیە و هەر پارێزگارێك بەبێ پارتی بۆ ئەو شارە دابنرێت، سەركەوتوو نابێت و پارتیش هەڵوێستێكی توندی دەبێت.
دوای ئەوەی بەهۆی خنكانی 120 كەس لە رووداوەكەی نغرۆبوونی كەشتیێكی گەشتیاری لە مووسڵ لە یەكەم رۆژی نەورۆز، ئەنجوومەنی نوێنەرانی عێراق لە دانیشتنی رۆژی 24ی مارسی ئەمساڵ بە زۆرینەی دەنگ دوورخستنەوەی نەوفەل عاكوب، پارێزگاری نەینەوا و هەردوو جێگرەكەی لە كارەكانیان پەسەند كرد، ئێستاش بۆ پڕكردنەوەی پۆستی پارێزگار، دەرگای خۆكاندیدكردن بەڕووی ئارەزوومەنداندا كراوەتەوە".