ئایار 24, 2019

لە شێخان زەوی بەسەر خێزان و كەسوكاری شەهیدان دابەشكران

قایمقامی شارۆچكەی شێخان دیاركرد، تاكو ئێستا بە هەزاران پارچە زەوی و بە سەدان خانوو بەسەر خێزان و كەسوكاری شەهیدان دابەشكراون، لە سنووری شارۆچكەی شێخان 24 پارچە زەوی دیكە دابەشكران، ئەوەش بووە جێگەی خۆشحاڵی خێزان و كەسوكاری شەهیدان.

سەردار شێخ یەحیا، قایمقامی شارۆچكەی شێخان بۆ دەزگاكانی راگەیاندن دیاركرد، حكوومەتی هەرێمی كوردستان لەسەرەتای دامەزراندنی هەر لە كابینەی یەكەمەوە تاكو ئێستا بەردەوام هەست بەوە دەكات كە بەرپرسیارەتی خۆی جێبەجێ بكات بەرامبەر بە خێزانی شەهید و كەسوكاری شەهیدان، كە ئەركی حكوومەتی هەرێمی كوردستانە خزمەتیان بكات، تاكو ئێستا بە هەزاران پارچە زەوی و بەسەدان خانوو بەسەر خێزان و كەسوكاری شەهیدان دابەشكراون و ئیمتیازات دراوەتە كەسوكاری شەهیدان، لە رێگەی زانكۆ و پەیمانگاكانەوە خزمەت دەكرێن، لەرووی تەندرووستییەوە خزمەت بە كەسوكاری شەهیدان كراوە و لە داهاتووشدا كاری زۆر باشتریان بۆ دەكرێت.
قایمقامی شارۆچكەی شێخان گوتیشی:" لە سنووری شارۆچكەی شێخان 24 پارچە زەوی بەسەر ئەو خێزانانە دابەشكران كە تا ئێستا سوودمەند نەبوونە، ئەوەش بە بێ گوێدان بەلایەنی سیاسی، تەنیا هی لایەنێكی سیاسی نەبوون، بەڵكو هەموو شەهیدن و شەهیدی كوردستانن، لە نەتەوە و ئاینی جودانە، ئەوەش زۆر گرنگە ئەو هەمەڕەنگییە، شەهیدەكانیش شەهیدی پێش شەڕی داعش بوون، ئەوانەی شەڕی تیرۆری داعش بە خۆشحاڵییەوە هەموویان سوودمەند بوونە لە پارچە زەوی و كاری زۆر باشیش بۆ كراوە".

© 2017 Hawler