تشرینی یەکەم 16, 2019

نوری بریمۆ: هەڵوێستی هەرێمی كوردستان لەسەر عەفرین بەرز دەنرخێنین

ئەندامێكی كۆمیتەی ناوەندی پارتی دیموكراتی كوردستان- سووریا، رایگەیاند، هەڵوێستی هەرێمی كوردستان لەسەر عەفرین بەرز دەنرخێنین و داوامان لە كۆمەڵگەی نێودەوڵەتی كردووە لەسەر عەفرین بە جواب بێت و هەرچی زووە ئەو شەڕە ڕابگرێت، چونكە ئەو شەڕە دژی گەلی كوردە. ڕوونیشیكردەوە، پەیەدە بە عەقلیەتی وڵاتانی دەوروبەر بەڕێوەدەچێت و ئەوان لێ ناگەڕێن ناو ماڵی كورد یەك بێت.
نوری بریمۆ، ئەندامی كۆمیتەی ناوەندی پارتی دیموكراتی كوردستان- سووریا، بۆ"هەولێر" گوتی: ئەوەی ئێستا لە عەفرین روودەدات پلانێكی هەرێمییە، كۆمەڵگەی نێودەوڵەتی تەماشا دەكات، كە ئێستا شەڕێكی توند لە عەفرین و دەوروبەری هەیە، كەسانی مەدەنی شەهید دەبن، كورد و كوردایەتی لە عەفرین لە مەترسییەكی گەورەدایە.

ڕوونیشیكردەوە، پەیەدە نەك لە كاتی خۆی ڕێگەی بە حزب و لایەنەكانی رۆژئاوا و هێزی پێشمەرگەی نەدا لە رۆژئاوا خەبات بكەن، بەڵكو ئێستاش ڕێگە بە حزب و لایەنەكانی رۆژئاوا نادات كە تا ئێستا چەندین كەس لە ئەندام و لایەنگرانی حزبەكانی رۆژئاوا لە زیندانەكانی پەیەدەدان و ئامادە نین ئازادیان بكەن، هەروەها ڕێگە بەهێزی رۆژئاوا نادات بگەڕێتەوە و بەرگری لە رۆژئاوا بكات، ئەگەر ئێستا ڕێگە بدات و لاپەڕەیەكی نوێ بكاتەوە، ئیدارەیەكی مەدەنی دروست بكرێت، بەڵام ئەوان ڕازی نابن و ئێستا رۆژئاوا بەشێوەیەكی سەربازی بەڕێوە دەبرێت، كاتی خۆی لەبەر پەكەكە لە باكووری كوردستان نزیكەی 4 هەزار گوند خراپ بوون و نەمان، ئێستاش لە رۆژئاوا، بەتایبەتی لە عەفرین بەهۆی پەیەدە زیاتر لە 300 گوند چۆڵكراون و خەریكە خراپ دەبن، پەیەدە بە عەقلیەتی وڵاتانی دەوروبەر بەڕێوەدەچێت و ئەوان لێ ناگەڕێن ناو ماڵی كورد یەك بێت.
بریمۆ، ئەوەشی گوت، ئێمە داوامان لە كۆمەڵگەی نێودەوڵەتی كردووە لەسەر عەفرین بە جواب بێت، چونكە ئەو شەڕە دژی گەلی كوردە، بۆیە پێویستە هەرچی زووە كۆمەڵگەی نێودەوڵەتی بە جواب بێت و ئەو شەڕەی هەیە ڕابگیرێت، بۆ ئەوەی چی دیكە خەڵكی مەدەنی شەهید نەبن.
نوری بریمۆ، ئەندامی كۆمیتەی ناوەندی پارتی دیموكراتی كوردستان- سووریا، ئاماژەی بەوەش كرد، هەرێمی كوردستان لەلای خۆیەوە هاتووەتە دەنگ و ئیدانەی بۆردوومانەكە دەكات و ئاوارەكان وەردەگرێت و دەستی هاوكاری درێژ دەكات و داوای ڕاوەستاندنی شەڕ دەكات، هەروەها شاندێكی پەرلەمانی كوردستان چووەتە شارەكە ئەوەش شتێكی زۆر باشە، هەڵوێستێكی نەتەوەیی و برایەتییە، بەڵام ئەو شەڕە بە چوونی شاندێك ڕاناوەستێت، ڕەوشی هەرێم خۆی ئێستا باش نیە و ئەویش پاش داگیركردنی كەركووك كەوتووەتە قۆناغێكی دیكە و ئێمە حەز ناكەین باری ئەوانیش گران بكەین، بۆیە ئێمە داوا لە كۆمەڵگەی نێودەوڵەتی دەكەین ئەو شەڕە ڕابگرێت، چونكە ئەوەی زیانی بەردەكەوێت تەنیا خەڵكی مەدەنییە، ئەگەر ئەو شەڕە ڕانەگیرێت، وەكو چۆن كەركووك و شنگال وێران بوون، عەفرین خراپتری بەسەر دێت، بۆیە پێویستە هەرچی زووە ئەو شەڕە ڕابگیرێت".

 

دواترین دەستکاریکردن لەسەر چوار شەممە, 14 شوبات 2018 06:12
© 2017 Hawler