تەمموز 19, 2019

جێگری سەرۆك كۆماری توركیا: ئامانجمانە 70 ملیۆن گەشتیار لەخۆ بگرین

جێگری سەرۆك كۆماری توركیا، گەشبینە بە ئاییندەی ئابووری وڵاتەكەی و دەڵێت ئامانجمانە لە چەند ساڵی داهاتوو رێژەی گەشتیار بۆ توركیا بۆ ئاستی 70 ملیۆن بەرز بكەینەوە و 70 ملیار دۆلاریش داهاتی كەرتی گەشتیاریمان بێت لە ساڵێكدا.

فوئاد ئۆكتای جێگری سەرۆك كۆماری توركیا، لە وتارێكیدا لە ئەنتاڵیا موژدەی دایە خەڵكی شارەكە كە گرنگییەكی زۆر بە ئەنتاڵیا دەدەن، چونكە رێژەی گەشتیار بۆ ئەو شارە ساڵ بە ساڵ روو لە زیادبوونە و ئامانجیشیانە ئەو شارە لەرووی گەشتیارییەوە برەو پێ بدەن.
گوتیشی: "لە كەرتی گەشتیاری تەنیا گرنگی بە دەریا و قوم نادەین، بەڵكو شوێنە مێژووییەكان و كلتوور و هونەریش دەبێتە بەشێكی گرنگی كەرتی گەشتیاری لە توركیا و برەوی پێ دەدەین. ئامانجمانە رێژەی گەشتیار لە ساڵێكدا بۆ 70 ملیۆن بەرز بكەینەوە و داهاتیش بۆ 70 ملیار دۆلار بەرز بكەینەوە".
ئۆكتای بەڵێن بە هاووڵاتیانی توركیا دەدات، كە ئەركی حكوومەتە نرخی میوە و سەوزە وەكو خۆی لێ بكاتەوە، چونكە بە رێژەیەكی بەرچاو نرخەكەی گران بوە.
لە توركیا نرخی سەوزە و میوە بە رێژەیەكی بەرچاو گران بوە، بۆیە ئۆپۆزسیۆنی توركیا رەخنەی توندی لە حكوومەت گرتوە و دەڵێت ناتوانن وڵات بەڕێوە ببەن.
بە هۆی توركیا لە هەڵبژاردنی شارەوانییەكان نزیك دەبێتەوە، بۆیە پارتە سیاسییەكان لایەنی ئابووریان بە گرنگ زانیوە بۆ پروپاگندەی هەڵبژاردن. ئاكپارتی بەڵێن دەدات رەوشی ئابووری توركیا باش بكاتەوە، ئۆپۆزسیۆنیش دەڵێت بەوان چاك ناكرێت و دەبێت ئەو دەسەڵاتە بگۆردرێت.
لە لای خۆشییەوە ئیبراهیم كاڵن وتەبێژی سەرۆكایەتی كۆماری توركیا، ئاماژەی داوە كە ئەركی حكوومەتە نرخی تەماتە و بیبەر لە توركیا هەرزان بكات، چونكە بەرزبوونەوەی نرخەكان ئاسایی نییە.
لە لایەكی ترەوە كەوتنی باڵەخانەیەكی 7 نهۆنی لە ئیستەنبۆڵ و مردنی 21 كەس، شەڕی نێوان دەسەڵات و ئۆپۆزسیۆنی تۆختر كردوەتەوە. بە هۆی داڕوخانی باڵەخانەیەكی نیشتەجێبوون لە ئیستەنبۆڵ، دەیان هاووڵاتی توركیا گیانیان لە دەستدا و، گەڕان بە دوای دۆزینەوەی تەرمی هاووڵاتیانیش بەردەوامە.
دوێنی لە ئیستەنبۆڵ لە گەڕەكی كارتال، باڵەخانەیەكی 7 قاتی كەوتە خوارەوە و دەیان هاووڵاتی نیشتەجێی ناو بینایەكەش كەوتنە ژێر باڵەخانەكە و تاوەكو ئێستاش 21 كەس گیانیان لە دەستداوە.
سولەیمان سویلو وەزیری ناوەخۆی توركیا، لە كۆنگرەیەكی رۆژنامەوانیدا ئاشكرای كرد، تاوەكو ئێستا تیمەكانیان توانیویانە 21 كەس بە مردوویی لەژێر باڵەخانەكەدا دەربهێنن و گەڕانیش بە دوای دۆزینەوەی تەرمی ئەوانی تر بەردەوامە.
هەر دوێنێ رەجەب تەییب ئەرۆدغان سەرۆك كۆماری توركیا، ئاماژەی دا كە كەوتنی ئەو بالەخانەیە بە هۆی خراپی دروستكردنییەوە بوە، بۆیە پێویستە ئەوانەی كەمتەرخەم بوونە سزا بدرێن.
كەمال كلیچدارئۆغلو لەسەر ئەو رووداوە رەخنەی توند لە دەسەڵات دەگرێت و، دەڵێت خراپی دروستكردنی ئەو باڵەخانەیە وای كردوە بڕوخێت و هاووڵاتیانمان شەهید ببن. هەروەها ئاماژەی دا كە لە توركیا هیچ شتێك بە باشی ناچێتە رێوە.
دەسەڵات دان بەوەدا دەنێت كە باڵەخانەكە بە باشی درویت نەكراوە، بەڵام كەمتەرخەمییەكە دەخاتە ئەستۆی ئەو لایەنەی دروستی كردوە. هەروەها ئەردۆغان لە وتارێكدا لە ئەنكەرا ئاماژەی دا، ئۆپۆزسیۆن دەیەوێت بە هۆی گرانبوونی نرخی تەماتە و بیبەر دەنگ بۆ خۆی كۆ بكاتەوە، بەڵام خەیاڵیان خاوە و میللەت باش لە بارودۆخەكە حاڵی بوە.

 

كارزان گلی ـ هه‌ولێر

© 2017 Hawler