تشرینی یەکەم 21, 2019

ئەمریکا: حکومەتی سووریا گازی کلۆرینی بۆ تیرۆرکردنی خەڵکی مەدەنی بەکارهێناوە

وەزارەتی دەرەوەی ئەمریکا راگەیێندراوێک لەبارەی بەکارهێنانی گازی کلۆرین لە شاری سەراقیبی سووریا بڵاودەکاتەوە و رایدەگەیێنێ: "ئەمریکا بە بیستنی بەکارهێنانی گازی کلۆرین لەلایەن رژێمی سووریا تاساوە".
لە راگەیێندراوەکەی وەزارەتی دەرەوەی ئەمریکادا هاتووە: "ئەمجارە لە سەراقیبی پارێزگای ئیدلب، رژێمی سووریا گازی کلۆرینی بۆ تیرۆرکردنی خەڵکی سڤیلی سووریا بەکارهێناوە". لەو شارە شەڕ لەنێوان هێزەکانی سەر بە حکومەتی بەشار ئەسەد و هێزەکانی ئۆپۆزیسیۆن بەردەوامە.
هیزەر ناوێرت، گوتەبێژی وەزارەتی دەرەوەی ئەمریکا، لەگەڵ بڵاوکردنەوەی لینکی راپۆرتەکە لە تویتەر، رایگەیاندووە: "ئەمە شەشەم جارە لەماوەی 30 رۆژی رابردوودا راپۆرتی بەکارهێنانی گازی کلۆرمان لە سووریا بەدەستبگات

".
گوتەبێژی وەزارەتی دەرەوەی ئەمریکا ئاماژەی بەوەش کردووە کە هەوڵدەدەن کۆمەڵگەی نێودەوڵەتی لەسەر گوشارخستنەسەر رووسیا و یاوەرانی یەکبخەن، تاوەکو بەکارهێنانی گازی کیمیاویی لە وڵاتەکە رابگرن.
ئەمریکا پەنجەی تۆمەت بۆ رووسیاش درێژدەکات و دەڵێت: "مۆسکۆ پابەند نەبووە بەوەی رێگریی لە سووریا بکات چەکی کیمیاویی بەکارنەهێنێت".

© 2017 Hawler