حوزەیران 04, 2020

نۆژەنكردنەوەی بازاڕی قەیسەری كەركووك لە لایەن توركیاوە دەستی پێكرد

دەسەڵاتدارانی توركیا بڕیاریانداوە بازاڕی قەیسەری كەركووك نۆژەن بكەنەوە، ئەمەش دوای ئەوەی بە هۆكارێكی نادیار تەواوی بازاڕەكە گڕی گرت. لەرووی تەكنیكییەوە ئەندازیارانی توركیا دەستیان بە كاركردن لەو بازاڕە كردوە.

جونێت ئەسمەر بەڕێوەبەری ئاژانسی هەماهەنگی و هاوكاری یەكێتی توركیا، لە كۆنگرەیەكی رۆژنامەوانیدا ئاشكرای كرد، تیمێكی ئەندازیارییان رەوانەی بازاڕی قەیسەری كەركووك كردوە و، لەرووی تەكنیكییەوە كار دەكەن بۆ ئەوەی لە ماوەیەكی نزیكیش لەرووی پراكتیكەوە دەست بە نۆژەنكردنەوەی بكرێت.
ئەو باسی لەوەش كرد كە ئێستا ئەو تیمەیان قەیسەرییەكە پاك دەكەنەوە و لێكۆڵینەوەی جیدی لەبارەوە دەكەن، پاشان شارەزایان راپۆرتێك بۆ ئەوان بەرز دەكەنەوە و دەست دەكرێت بە نۆژەنكردنەوە.
گوتیشی: "ئێمە پەیوەندیمان لەگەڵ پارێزگاری كەركووكدا هەیە و، هەروەها بەڕێوەبەری ئاسەوار لەو شارەدا هاوكاریمان دەكات. ئێمە دەمانەوێت ئەو میراتەی عوسمانییەكان لە كەركووك بە جێیان هێشتوە وەكو خۆی بمێنێتەوە و لەناو نەچێت".
باسی لەوەش كرد، كە شارەزایانی ئەندازیاری توركیا گوتویانە، بناغەی بازاڕی قەیسەری زیانی پێنەگیشتوە، كە ئەمەش هەواڵێكی خۆشە و تەنیا لە ژوورەوە بە شێوەیەكی زۆر پیس بوە و پێویستە كاری زۆر جیدی تێدا بكرێت تا وەكو خۆی لێ دێتەوە.
بازاڕی قەیسەری كەركووك لە 26_11_2018 بە هۆكارێكی نادیار گڕی گرت و سەدان دوكان بوون بە خۆڵە مێش. حكوومەتی توركیا لە پڕۆژە بودجەی ساڵی 2019 بودجەیەكی تایبەتی بۆ نۆژەنكردنەوەی ئەو بازاڕە تەرخان كردوە.

 

كارزان گلی ـ هه‌ولێر

© 2017 Hawler