نیسان 06, 2020

وڵاتی تریش هەن بڕیاری دادگای مافی مرۆڤی ئەوروپایان جێبەجێ نەكردوە

وەزیری دەرەوەی توركیا لە تازەترین دیمانەیدا، رەخنە لە بڕیاری دادگای ئەوروپا دەگرێت لەبارەی ئازادكردنی سەلاحەدین دەمیرتاشەوە. ئەو ئاماژە دەدات كە پێشتر چەند وڵاتێكی ئەوروپی بڕیاری دادگای مافی مرۆڤی ئەوروپایان جێبەجێ نەكردوە.

مەولوود چاوشئۆغلو لە دیمانەیەكیدا لەگەڵ رۆژنامەی (Süddeutsche Zeitung)ـی ئەڵمانی رەخنە لە بڕیاری دادگای مافی مرۆڤی ئەوروپا دەگرێت و دەڵێت سیاسییە.
ئەو دەڵێت: "پێشتر دادگای مافی مرۆڤی ئەوروپا لەبارەی كەیسی دەمیرتاشەوە بڕیارێكی تری داوە، دووەم ئەمە بڕیارێكی سیاسییە و نابێت ئەو دادگایە بڕیاری لەو شێوەیە بدات، بۆیە ئێمە وەكو توركیا تەمیزی ئەو بڕیارە دەكەینەوە و رەتی دەكەینەوە".
باسی لەوەش كرد، پێشتر كەمینەكان لە یۆنان ویستویانە كۆمەڵەیەك بكەنەوە و ناوی توركی لێ بنێن، بەڵام یۆنان رەتی كردوەتەوە، بۆیە كەیسەكە چوەتە دادگای مافی مرۆڤی ئەوروپا و ئەویش بڕیاریداوە كە رێگە بدرێت ئەو كۆمەڵەیە ناوەكەی توركی بێت، بەڵام 10 ساڵە یۆنان بڕیارەكەی جێبەجێ نەكردوە.
لەبارەی كوشتنی جەمال قاشوقچی رۆژنامەنووسی سعوودی لەناو كونسوڵخانەی سعوودیا لە ئیستەنبۆڵ، چاوشئۆغلو ئاماژە دەدات كە بە دڕندانە كوشتویانە.
ئەو دەڵێت: "گوێم لە تۆماری دەنگی بوە كە لە لایەن دەزگای هەواڵگری توركیا بڵاوكراوەتەوە زۆر نیگەرانی كردم. قاشوقچی لە نێوان 7 خولەكدا كوژراوە و پاشان پارچە پارچە كراوە و، ئەو كەسانەی پارچە پارچەی دەكەن بە دیاری گوێگرتن لە موزیكەوە تەرمی قاشوقچی پارچە پارچە دەكەن، ئەمەش دەریدەخات كە چێژ لە پارچە پارچەكردنی مرۆڤ وەردەگرن، بەڕاستی جەرگبرە".

 

كارزان گلی ـ هه‌ولێر

© 2017 Hawler