ئەیلول 20, 2019

ئامادەكارییەكان بۆ هەڵبژاردنی پێشوەختەیە

ئاكپارتی ئامادەكاری تەواو دەكات تا بە زووترین كات ناوی كاندیدانی پارتەكەی بۆ سەرۆك شارەوانی و ئەندام ئەنجوومەنی شارەوانییەكان رابگەیەنێت. ئامادەكارییەكانیش بەو ئاڕاستەیە دەڕوات كە بە نیاز بن هەڵبژاردنی شارەوانییەكان لە كاتی خۆیدا نەكرێت و بهێنرێتە پێش.

رۆژنامەی (حوریەت)ـی توركی بڵاوی كردوەتەوە، ئاكپارتی خەریكی ئامادەكارییە بۆ هەڵبژاردنی شارەوانییەكان، بۆ ئەمەشیان كەسی شارەزا و لێهاتوو كاندید دەكەن، هەروەها هەر سەرۆك شارەوانییەكیش كاری باشی نەكردبێت كاندیدی ناكەنەوە.
بە گوێرەی هەواڵی حوریەت بێت، ئامادەكارییەكانی ئاكپارتی بە شێوەیەكە، كە هەڵبژاردنی شارەوانییەكان 7 مانگ بهێنرێتە پێش و لە وادەی خۆیدا نەكرێت.
هەڵبژاردنی شارەوانییەكان دەبوایە لە 30_3_2019 ئەنجام بدرێت، بەڵام سەرۆك كۆماری توركیا بۆی هەیە توركیا بباتە ناو هەڵبژاردنی پێشوەختەوە و، زۆربەی چاودێرانیش پێیانوایە هەڵبژاردنی شارەوانییەكان دەهێنێتە مانگی 9ی ئەمساڵ.
ئاكپارتی لە هەڵبژاردنی پەرلەمانی 7ی حوزەیراندا 42%ی دەنگەكانی هێنا، واتە 7% دەنگەكانی لە چاو هەڵبژاردنی پێشووتردا كەمی كردوە، بۆیە ئەگەر بەو ئەنجامە لە هەڵبژاردنی شارەوانییەكاندا لێی بچێتە دەرەوە، ئەوكات زۆربەی سەرۆك شارەوانییەكان دەكەوێـتە ژێر دەستی پارتە ئۆپۆزسیۆنەكانی توركیا، كە دیارترینیان جەهەپە و هەدەپەن.
باری ئابووری توركیا رۆژ بە رۆژ بەرەو خراپی دەچێت، بۆیە رەجەب تەییب ئەرۆدغان نایەوێت هەڵبژاردنی شارەوانییەكان بكەوێتە ساڵی 2019، چونكە دەزانێت تا ئەوكات خەڵك بەرگەی خراپی رەوشی ئابووری ناگرێت، بۆیە بۆ بەرژەوەندی پارتەكەی هەڵبژاردن دەكاتە مانگی 9ی ئەمساڵ. ئەمەش زۆربەی چاودێرانی سیاسی باسیان لێوە كردوە.

 

كارزان گلی ـ هه‌ولێر

© 2017 Hawler