تشرینی دووەم 27, 2020

كێ كاندیدی ئۆپۆزسیۆنە بۆ ركابەری رەجەب تەییب ئەردۆغان؟

كێ كاندیدی ئۆپۆزسیۆنە بۆ ركابەری رەجەب تەییب ئەردۆغان؟

 

 

هەر دوای ئەوەی لە هەڵبژاردنی شارەوانییەكانی ٣١_٣_٢٠١٩ ئۆپۆزسیۆن توانی سەرۆكی شارەوانی شارە گەورەكانی توركیا بباتەوە و، بۆ یەكەمجار دوای ١٨ ساڵ ئاكەپە پاشەكشەی پێكرا، ئیدی لەناو پارتە ئۆپۆزسیۆنەكانی توركیا باس لە كاندیدێك كرا بۆ ئەوەی لە هەڵبژاردنی داهاتووی سەرۆكایەتی توركیا ببێتە ركابەری رەجەب تەییب ئەردۆغان. شڕۆڤەكاران ناوی چەند كەسێكیان ئاشكرا كردووە كە ئەگەری زۆرە یەكێك لەوانە ببێتە ركابەری ئەردۆغان.

 

ئەكرەم ئیمامئۆغڵو سەرۆكی شارەوانی ئیستانبۆڵ، یەكێكە لەو كەسایەتییانەی لە لایەن ئیستانبۆڵییەكان و ئۆپۆزسیۆن قبوڵ كراوە، دوای ئەو سەركەوتنە گەورەیەی لە هەڵبژاردنی شارەوانییەكان بەسەر ئاكەپەش، ئیمامئۆغڵو لە ناوچەییەوە تێپەڕی و بووە كەسایەتییەكەی ناسراوی جیهانی و میدیا جیهانییەكان فۆكەسیان خستە سەری.

زۆرێك لە ئاژانس و میدیا جیهانییەكان، كۆك بوون لەسەر ئەوەی ئیمامئۆغڵو دەبێتە ركابەری ئەردۆغان و هەموو پارتە ئۆپۆزسیۆنەكانیش قبوڵیانە، بە تایبەت جەهەپە و پارتی باش و هەدەپە و پارتی سەعادەت.

بەڵام كەمال كلیچدارئۆغڵو سەرۆكی جەهەپە، مەیلی زیاتر بۆ مەنسوور یاڤاش سەرۆكی شارەوانی ئەنكەرایە و، پێی باشە ئەو كاندیدی ئۆپۆزسیۆن بێت بۆ هەڵبژاردنی داهاتووی سەرۆكایەتی توركیا، ئەمەشی لە كۆبوونەوەیەكی نهێنی پارتەكەی باس كردبوو.

جەهەپە لەناو خۆیدا كۆمەڵێك كێشەی بۆ دروست بوو، ئەویش بە هۆی جانان كەفتانجیئۆغڵو سەرۆكی لقی جەهەپە لە ئیستانبۆڵ، كاتێك وشەی ئەتاتوركی بە شێوەیەكی خراپ بەكارهێنابوو و پاشان لە لایەن بەشێكی جەهەپەییەكان داوا كرا دەربكرێت. بە هۆی ئەوەی جانان رۆڵێكی سەرەكی هەبوو لە دەرچوونی ئیمامئۆغڵو وەكوو سەرۆكی شارەوانی ئیستانبۆڵ، بۆیە بەشێكی تری ناو جەهەپە دژی بۆچوونی یەكەم وەستانەوە، بەمەش كێشە ناوەخۆییەكانی جەهەپە تەشەنەی كرد و بووە باسوخواسی میدیاكان.

رۆژنامەی (سۆزجو) بڵاوی كردووەتەوە، كلیچدارئۆغڵو نایەوێت ئیمامئۆغڵو ببێتە كاندیدی ئۆپۆزسیۆن، چونكە ئەو پشتگیری لە جانان كرد و تا ئاستێكیش گوێڕایەڵی سەركردایەتی جەهەپە نییە و خۆی پێ لەوان گەورەترە.

هەروەها چەند نووسەرێكی تری توركیاش پێیانوایە، ئەگەر ئیمامئۆغڵو ببێتە كاندیدی ئۆپۆزسیۆن، ئەگەر زۆرە سەركەوتن بەسەر ئەردۆغاندا بەدەست بهێنێت، ئەوكات جێ بە كلیچدارئۆغڵوش لەق دەكات، چونكە ئیمامئۆغڵو وەكوو سەركردەكانی تر نییە و چاوی لە پۆستی باڵایە.

خۆ ئەگەر سەركەوتن بەسەر ئەردۆغانیشدا نەهێنێت، بەڵام ئەگەر توانی ٤٠٪ی دەنگەكان بەدەست بهێنێت ئەمە بۆ ئیمامئۆغڵو سەركەوتنە و دوور نییە وەكوو موحەرەم ئینجە كاندیدی جەهەپە و پارتی باش بۆ هەڵبژاردنی سەرۆكایەتی ٢٠١٨، كە ٣٦٪ی دەنگەكانی بەدەست هێنا و پاشان داوای كرد ببێتە سەرۆكی جەهەپە و بە كلیچدارئۆغڵوی گوت ئەو پۆستە شایەنی منە.

رەنگە زۆرێك وا بیر بكەنەوە، كە جارێ زووە باس لە كاندیدی ئۆپۆزسیۆن بكرێت بۆ هەڵبژاردنی داهاتووی توركیا، چونكە هەڵبژاردنی سەرۆكایەتی و پەرلەمانی لە ٢٠٢٣ ئەنجام دەدرێت. بەڵام راستییەكەی شتێكی ترە، ئەویش چوونی توركیایە بۆ هەڵبژاردنی پێشوەختە، واتە ئۆپۆزسیۆن لە ئێستاوە كار دەكات بۆ دیاری كردنی كاندیدێكی بەهێز بۆ ركابەری ئەرۆدغان لە ئەگەری ئەنجامدانی هەڵبژاردنی پێشوەختە.

بە گوێرەی زانیارییەكانی عەبدولقادر سەلفی رۆژنامەنووسی نزیك لە رەجەب تەییب ئەرۆدغان، جەهەپە و پارتی باش رێككەوتوون لەسەر ئەوەی عەلی باباجان سەرۆكی پارتی دەوا بكەنە كاندیدی خۆیان بۆ هەڵبژاردنی سەرۆكایەتی، چونكە كەسایەتییەكە پێشتر جێگری سەرۆك وەزیران بووە و هەروەها وەزیری دارایی بووە و سەركەوتنی بەدەست هێناوە لەو پۆستە و لە لایەن خەڵكیشەوە خۆشەویستە، جگە لەوەش كەسایەتییەكی موحافیزكارە و دەتوانن لەو رێگەیەوە دەنگی موحافیزكارەكانیش رابكێشن.

دەنگدەری باكووریش، بە تایبەت موحافیزكارەكان تا ئاستێك دەیانەوێت بەدیلێك بۆ ئەردۆغان بدۆزنەوە، چونكە بە هۆی ئەو توندییەی بەرامبەر بە كورد هەیەتی لێی توڕەن و نایانەوێت جارێكی تر دەنگی پێ بدەنەوە، بۆیە باباجانیش زوو زوو دەچێتە باكوور و لەوێ میتینگی جەماوەری ئەنجام دەدات و بەڵێنی چارەسەركردنی كێشەی كوردیش دەدات.

ركابەری ئەرۆدغان لە هەڵبژاردنی داهاتووی توركیا لە ٣ كەس تێپە ڕناكات، ئەوانیش (ئەكرەم ئیمامئۆغڵو، مەنسوور یاڤاش، عەلی باباجان).

 

کارزان گلی

© 2017 Hawler