ئاب 05, 2020

ساڵی ٢٠١٩ گەشتیاری تورك ٣٣٠ملیۆن یۆرۆیان لە یۆنان خەرج كردووە

بارودۆخی سیاسیی نێوان توركیا و یۆنان هەرچەندە خراپ بووبێت، كاری نەکردووەتە سەر گەشتیاری توركیا و ساڵانە سەدان‌هەزار گەشتیاری توركیا روویان لە دوورگەكانی یۆنان كردووە، بەڵام لەمساڵدا یۆنان بە هۆی بوونی كۆرۆناوە رێگە نادات گەشتیاری توركیا بێتە وڵاتەكەی.

رۆژنامەی (حوڕیەت)ـی توركی لە راپۆرتێكدا كە لە یۆنان ئەنجامی داوە، بۆچوونی یۆنانییەكانی وەرگرتووە لەسەر گەشتیاری توركیا.
خاوەن رێستورانت و هۆتێلەكانی یۆنان بۆ (حوڕیەت) قسەیان كردووە و دەڵێن: ”بیری گەشتیاری توركی دەكەینەوە؛ ئەوان وەكو گەشتیاری ئەڵمانی نین بە زەڵاتەیەك سكی خۆیان تێر بكەن. گەشتیاری توركیا كاتێك دێنە رێستورانت ماسیەکی گران و خواردنی دەریایی دەخۆن و پارەی زۆر خەرج دەكەن“.
بە گوێرەی زانیارییەكانی رۆژنامەی ناوبراو، تەنیا لە ساڵی ٢٠١٩، گەشتیاری تورك بڕی ٣٣٠ملیۆن یۆرۆیان لە دوورگەكانی یۆنان خەرج كردووە.
بەرپرسێك لە وەزارەتی گەشتوگوزاری یۆنان كە ناوی خۆی نەدرکاندووە، ئاماژەی داوە كە هەر گەشتیارێكی توركیا بەرامبەر ٧ گەشتیاری ئەورووپییە لە خەرجكردنی پارەدا.
یۆنان دەرگای بە ڕووی ١٤ وڵاتی ئەورووپاییدا كردووەتەوە كە بە مەبەستی گەشتیاری روو لە وڵاتەكەیان بكەن، بەڵام رێگە نادات گەشتیاری توركیا بێنە یۆنان، هۆكارەكەشی بۆ ئەوە دەگەڕێتەوە كە تاوەكو ئێستا توركیا یەكێكە لە وڵاتە پڕ مەترسییەكانی كۆرۆنا.
بە گوێرەی زانیارییەكان، ساڵێ ٢٠١٩ نزیكەی ٣٣ملیۆن گەشتیار روویان لە یۆنان كردووە، بڕی ١٩ملیار یۆرۆیان لەو وڵاتەدا خەرج كردووە و، لەو رێژەیەش ملیۆنێک‌و٩٠هەزاریان لێ گەشتیاری تورك بوونە و ٣٣٠ملیۆن یۆرۆیان خەرج كردووە.

كارزان گلی - هه‌ولێر

© 2017 Hawler