حوزەیران 05, 2020

تەندروستی ئێران: لە هەر 10 بۆ 12 خولەكێك كەسێك بەهۆی كۆرۆنا دەمرێت

وەزارەتی تەندروستی ئێران رایگەیاند، لەماوەی هەر 10 بۆ 12 خولەكێك لە وڵاتەكەیان، كەسێك بەهۆی ڤایرۆسی كۆرۆنا گیان لەدەست دەدات.

كیانۆش جهانپور، وتەبێژی وەزارەتی تەندروستی ئێران رایگەیاند: بەم دواییانە رێژەی مردن بەهۆی ڤایرۆسی كۆرۆنا لە تارانی پایتەختی وڵاتەكەیان بۆ 13% بەرز بووەتەوە.

هەر لەم بارەشەوە عەلی رەزا زالی، فەرماندەی ئۆپەراسیۆنەكانی بەرەنگاربوونەوەی ڤایرۆسی كۆرۆنا لە ئێران رایگەیاند، هێشتا تاران نەگەیشتووەتە قۆناغی تەنینی ڤایرۆسی كۆرۆنا و هۆشداریشی دا، لە ئەگەری كەمتەرخەمیی هاووڵاتیان بەرامبەر مەترسییەكانی ئەو پەتایە و پابەند نەبوونیان بە رێنماییەكان، دۆخەكە لەدەست دەربچێت.

ئەو بەرپرسە ئێرانییە دووپاتیكردەوە، "سەرەتا پێشبینیمان دەكرد، دانیشتوانی تاران پابەندی رێنماییەكان بن و لە ماڵەكانیان دەرنەچن، بەڵام وا دەرنەچوو و خەڵكی پابەندی رێنماییەكان و هۆشدارییەكانی لایەنە پەیوەندیدارەكان نەبوون".

پێشتریش هەر ئەمڕۆ، وەزارەتی تەندروستی ئێران رایگەیاندبوو، ژمارەی تووشبووان بە ڤایرۆسی كۆرۆنا لە وڵاتەكەیان بۆ 24 هەزار و 811 حاڵەت بەرزبووەتەوە، لەو ژمارەیەش تا ئێستا هەزار و 934 كەس گیانیان لەدەستداوە.

 

© 2017 Hawler