نیسان 02, 2020

توركیا ترسی هەیە باكووریش چاو لە باكووری قوبرس بكات

كارزان گلی - هه‌ولێر

 

سەرۆك كۆماری باكووری قوبرس، كە بە قوبرسی توركیا ناسراوە، داوا دەكات قوبرس سەر بە هیچ لایەنێك و ڵاتێك نەبێت، بەڵكوو بۆ خۆی خۆی بەڕێوە ببات، ئەمەش بەرپرسانی توركیای توڕە كردووە و بە توندی دژی وەستاونەتەوە.

موستەفا ئاكنجی سەرۆك كۆماری باكووری قوبرس، لە دیمانەیەكیدا بۆ رۆژنامەی (گاردیان) ئاماژەیدا، كە لە قوبرس ئەوانەی توركن و تەنانەت ئەو رومانەی كەمینەشن لەم وڵاتەدا دەژین، نایانەوێت بە توركیا ببەسترێنەوە و نایانەوێت لەگەڵ وڵاتی توركیادا بژین.
ئاكنجی دەڵێت: ”قوبرس بیری ئەوە دەكات كە خۆی خۆی بەڕێوە ببات، خۆی خاوەنی خۆی بێت و دامەزراوەكانی خۆی بەڕێوە ببات. بێگومان لەڕووی ئابوریشەوە دەمانەوێت سەركەوتوو بین و خۆمان بەڕێوە ببەین، نەك توركیا بەڕێوەمان ببات“.
ئەم گوتانەی ئاكنجی عومەر چەلیك وتەبێژی ئاكەپەی هێنایە دەنگ و گوتی ئەم گوتانە بێڕێزییە بەرامبەر بە توركیا و بێڕەوشتی كردووە، بۆیە دەبێت داوای لێبوردن بكات.
لە لای خۆشییەوە دەوڵەت باخچەلی سەرۆكی مەهەپە، لە پێگەی خۆی لە تویتەر لەسەر ئەو گوتانەی ئاكنجی هاتە دەنگ و، گوتی دەبێت بزانن كە باكووری قوبرس توركیایە و وەكو توركیاش دەمێنێتەوە، هەروەها وڵاتێكی توركیشە.
باخچەلی داوای لە سەرۆك كۆماری توركیا رەجەب تەییب ئەردۆغان كرد، كە بە زووترین كات ئاكنجی لە پۆستی سەرۆك كۆماری باكووری قوبرس لابدات.
بەڵام ئاكنجی لە بەرامبەر ئەو هێرشانەی كرایە سەری، لە نوێترین هەڵوێستیدا، لە پێگەی خۆی لە تویتەر ئاماژەی داوە، كە ئەو دروشمەی دەڵێت ”قوبرس توركییە و هەر بە توركیش دەمێنێتەوە“ هی سەردەمی سیاسەتی ساڵانی پەنجایەكانە و ئێستا هیچ بایەخێكی نییە.
لەبارەی ئەو لێدوانانەشی كە بۆ (گاردیان) دابووی، ئاكنجی دەڵێت لە پشت هەموو قسەكانی خۆمم و لە هیچیان پەشیمان نیم.
لە سەروبەندی هێرشی توركیا بۆ سەر رۆژئاوای كوردستان، ئاكنجی لە توێتێكدا بە هەمان شێوە بەرپرسانی توركیای توڕە كرد و، گوتی شەڕ چارەسەری كێشەكان ناكات و لەگەڵ ئەوە نیم توركیا هێرش بكاتە سەر رۆژئاوای كوردستان.
ئەوكاتیش باخچەلی و چەند سەركردەیەكی توركیا، داوایان كرد ئاكنجی لە سەرۆك كۆماری باكووری قوبرس دوور بخرێتەوە، بەڵام نەتوانرا هیچی بەرامبەر بكرێت.
چەند نووسەرێكی توركیا نووسیویانە، ئەگەر بێت و ئەو گوتانە بەسەر ئاكنجیدا تێپەرێت، ئەوكات باكووری كوردستانیش داوای جیابوونەوە دەكەن. ئەوان پێیانوایە كە بوێری ئاكنجی، بوێری دەداتە باكووریش بۆ ئەوەی بڵێین باكوور توركیا نییە و كوردستانە.

ئایە ئەردۆغان دەتوانێت لە پۆستی سەرۆكایەتی لای بدات؟
وەكو ئاشكرایە باكووری قوبرس لە ژێر چەتری توركیایە لە هەموو روویەكەوە، بۆ نموونە ئابووری ئەو وڵاتە توركیا دابینی دەكات، سیستەمی وڵاتەكە توركیا دایڕشتووە، هەروەها لە هەڵبژاردنەكاندا كەسێك بووەتە كاندید كە پیاوی توركیا بووە و لە فەرمانی توركیا لای نەداوە.
بەڵام موستەفا ئاكنجی، ئەگەرچی لە كاربەدەستانی توركیا نزیكە و هەر ئەو نزیكییەش وایكرد شانسی بوون بە سەرۆك كۆماری باكووری قوبرسی هەبێت، بەڵام ئێستا داوای جیابوونەوە لە توركیا دەكات و، دەڵێت ئێمە خۆمان خۆمان بەڕێوە دەبەین.
بەرپرسانی توركیا داوا لە ئەردۆغان دەكەن لە پۆستەكەی لای بدات، بەڵام لادانی ئاكنجی ئەوەندە ئاسان نییە، چونكە ئەو بە دەنگی خەڵك هەڵبژێردراوە، بەڵام توركیا دەتوانێت پاڵەپەستری بخاتە سەر و گۆشەگیری بكات، تا خۆی دەست لە كار بكێشێتەوە.
واتە وەكو چۆن ئەردۆغان بە زۆر دەستلەكاركێشانەوەی بە ئەحمەد داودئۆغڵو كرد، كە بە دەنگی خەڵك ببووە سەرۆك وەزیرانی توركیا، بە هەمان شێوە دەتوانێت ئەو پاڵەپەستۆیە بخاتە سەر ئاكنجی و لە سەرۆك كۆماری باكووری قوبرس دووری بخاتەوە.

© 2017 Hawler