کانونی دووەم 25, 2020

ئیستانبوڵ دەچێتە ناو راپرسییه‌كی ترەوە

بە هۆی ئەو ناكۆكییەی كەوتووەتە نێوان رەجەب تەییب ئەردۆغان سەرۆك كۆماری توركیا و ئۆپۆزسیۆنی توركیا لەبارەی پڕۆژەی (كەناڵ ئیستانبۆڵ)، ئەگەر زۆرە خەڵكی ئیستانبۆڵ لە ریفراندۆمێكدا ئەو پرسە یەكلایی بكەنەوە.

ئەردۆغان لە دیمانەیەكیدا ئاماژەی دا، كە ئەگەر ئۆپۆزسیۆن رازی بێت یان نا، ئەوان پڕۆژەی (كەناڵ ئیستانبۆڵ) ئەنجام دەدەن و گوێ بە كەس نادەن، بەڵام هاووڵاتیانی توركیا بوون بە ٢ بەش، بەشێكیان دژی ئەو پڕۆژەیەن و بەشەكەی تریش پشتگیری دەكات، بەشێك لە بەرپرسانی ناو ئاكەپەش پێیان باشە گوێ لە هەموو چین و توێژەكان بگیرێت بۆ ئەو پرسە.
رۆژنامەی (جومهوریەت)_ی توركی ئاشكرای دەكات، لەناو ئاكەپەدا چەند سەركردەیەك پێیان باشە لەبارەی ئەنجامدان و نەدانی ئەو پڕۆژەیە گوێ لە هەموو كەسێك بگیرێت، چونكە ئەگەر گوێیان لێ نەگیرێت توركیا بەرەو دابەشبوون دەچێت و رق و كینە سەر هەڵدەدات.
بە گوێرەی زانیارییەكانی ئەو رۆژنامەیە، بەشێكی زۆری سەركردەكانی ناو ئاكەپە پێیان باشە، بۆ یەكلایی كردنەوە ئەو پرسە ئیستانبۆڵ بچێتە ناو ریفراندۆمەوە.
ئەوان پێیان باشە هاووڵاتیانی ئیستانبۆڵ خۆیان بڕیار بدەن ئاخۆ پڕۆژەیەكی وەكو (كەناڵ ئیستانبۆڵ)_یان پێویستە یان نا؟ ئەمەش بە ئەنجامدانی ریفراندۆم.
بە گوێرەی ئەو زانیارییانەی ئەكرەم ئیمامئۆغلو سەرۆكی شارەوانی ئیستانبۆڵ بڵاوی كردووەتەوە، ئەگەر ئەو پڕۆژەیە ئەنجام بدرێت، ئیستانبۆڵ دووچاری بومەلەرزە دەبێتەوە و ئاوی پاكیش لە شارەكە نامێنێت و بێئاوی روو لەو شارە دەكات.
بەڵام ئەردۆغان هەموو ئەو دەنگۆیانە بە درۆ دەخاتەوە و، دەڵێت پرسمان بە ٥٣ دامەزراوە كردووە، هەموویان پێیان وایە بە ئەنجامدانی ئەو پڕۆژەیە هیچ مەترسییەك روو لە ئیستانبۆڵ ناكات.

 

© 2017 Hawler