کانونی دووەم 27, 2021

٤٤٪ی ئاوارە سوورییەكانی توركیا نایانەوێت بچنە ناوچەی ئارام

لێكۆڵەرێكی بەناوبانگی توركیا، ئاشكرای دەكات ئەو ئاوارە سوورییانەی لە توركیا نیشتەجێ بوونە، بەشێكی زۆریان نایانەوێت بگەڕێنەوە بۆ ئەو ناوچە ئارامەی توركیا بە نیازە لەسەر سنوور دروستی بكات. ئەو لێكۆڵەرە دەڵێت ٤٤٪ ئاوارەكان ناوچەی ئارامیان ناوێت بۆ ژیان.

عادل گوور لێكۆڵەری بەناوبانگی توركیا، لە دیمانەیەكیدا بۆ رۆژنامەی (جومهوریەت)_ی توركی، باس لە هەڵوێستی ئاوارە سوورییەكانی توركیا دەكات.
ئەو راستەوخۆ قسەی لەگەڵ كردوون و لەبارەی ناوچەی ئارام پرسیاری لێ كردوون، بۆیە دەریدەخات كە ٤٤٪ ئەو ئاوارانە ناوچەی ئارامیان ناوێت بۆ ژیان.
هەروەها گوور لەو دیمانەیەدا ئاماژە دەدات، كە ٣٠٪ی ئاوارەكان دەڵێن ”رەنگە بگەرێمەوە بۆ سووریا یان ئەو ناوچە ئارامەی دروست دەكرێت و رەنگیشە نەگەڕێمەوە بۆ سووریا“، واتە ئەو رێژەیە دوو دڵە لە گەڕانەوە و نەگەڕانەوە.
هەر بە گوێرەی گوتەی گوور، لە هەر ٤ ئاوارەی سووری، یەكێكیان دەڵێت دەمەوێت بگەڕێمەوە بۆ وڵاتی خۆم و لەوێ بژیم، واتە ٢٣٪ی ئاوارەكان دەڵێت چی دەبێت با ببێت، ئێمە وڵاتی خۆمانمان خۆش دەوێت و دامانەوێت بگەڕێینەوە.
لە لێكۆڵینەوەكەی گووردا دەركەوتوە، كە ٨٥٪ی ئاوارە سوورییەكان دڵخۆشن كە لە توركیا دەژین، بۆیە نایانەوێت بچنە وڵاتێكی ئەوروپی، بەتایبەت زۆربەیان هەموو خانەوادەكەیان لە توركیان و هەست بە غەریبی ناكەن.
بە شێوەیەكی گشتی، ئاوارە سوورییەكان مانگانە مووچەكەیان لە كاركردن لە خوار ٢ هەزار لیرەی توركییە، بۆیە گوور دەڵێت ئەوان بەو پارەیە دەتوانن بژێوی ژیانیان دابین بكەن.
بە گوێرەی ئاژانسەكانی هەواڵی توركیا، لە كۆبوونەوەی لوتكەی ناتۆ، فەڕەنسا و توركیا رێككەوتوون تا توركیا بە زۆرەملێ ئاوارەكان نەگەڕێنێتەوە بۆ سووریا و ناوچەی ئارام، ئەمەش تا ئاستێك بۆ پاكتاونەكردنی كورد لە رۆژئاوا گرنگە.
لە لایەكی ترەوە، چەند دەزگایەكی تری راپرسی لە توركیا، ئاشكرای دەكەن كە ئاوارە سوورییەكان ناتوانن بنە ئەو ناوەی ئارامەی توركیا بە نیازە دروستی بكات.
دەزگای رارسی (ئەدا) ئاشكرای دەكات، بەشیكی زۆری ئاوارە سوورییەكان مانەوەیان لە توركیا پێ خۆشترە وەكو لە سووریا، چونكە نازانن چارەنووسیان چی لێ بەسەر دێت.
ئەگەرچی ژیانی ئاوارەكان زۆر خۆش نییە لە توركیا، چونكە داهاتیان بەشی ژیانیان ناكات، بەڵام (ئەدا) ئاماژەی داوە كە ئاوارە سوورییەكان ترسیان لە ناوچەی ئارام ژیانیان تەواو گۆڕانی بەسەردا بێت و ئیدی نەتوانن لەو ناوچەیە زیاتر بچنە هیچ شوێنێك.

 

كارزان گلی ـ هه‌ولێر

© 2017 Hawler