تشرینی یەکەم 21, 2020

نووسەرانی توركیا داوا دەكەن توركیا پاڵپشتی سوپای سووریای ئازاد نەكات

سوپای سووریای ئازاد، ئەو سوپایەیە كە لە لایەن توركیاوە پاڵپشتی دارایی و لۆجیستی دەكرێن، لە هەموو شەڕێكیشدا ئەو سوپایە كە ١٠٠ هەزار كەس دەبن توركیا بەكاریان دەهێنێت، بەڵام نووسەرانی توركیا دژی ئەو سوپایە دەنووسن و پێشیانوایە ئەم سوپایە سومعە و قورسایی هێزی توركیای كەم كردوەتەوە.

ئەمین چۆڵەشان نووسەری دیاری رۆژنامەی (سۆزجو)_ی توركی، لە نووسنێكدا بڵاوی كردوەتەوە، دەڵێت سوپای سووریای ئازاد سوپا نییە و سەربازیش نییە، بەڵكو كۆمەڵێك كەسن پرچ درێژ و ریشنن و ترسناكیشن.
ئەو نووسەرە پێی وایە ئەو سوپایە هیچ جیاوازییەكی لەگەڵ گروپی تیرۆرستی داعشدا نییە و وەكو ئەوان بیر دەكەنەوە. دەشڵێت پێشتر لە لایەن سعوودیاوە هاوكاری دەكران بۆ لەناوبردنی ئەسەد، بەڵام ئێستا توركیا پشتگیرییان دەكات.
ئەمین چۆڵەشان دەنووسێت: ”بەرپرسانی مەهەپە كە خۆیان بە نەتەوەپەرست دەزانن، بەدڵنیاییەوە ئەو رەزالەتەی سوپای سووریای ئازاد دەبینن، بەڵام بێدەنگیان هەڵبژاردوە و بەداخەوە كە تاوەكو ئێستا بێدەنگن. ئەو لۆگۆیەی بەسەر دەستی ئەو كەسانەوەیە دیارە كە سووكایەتییە بە دەوڵەت و نەتەوە توركیا، چونكە سوپای توركیا خۆی بەهێزە و پێویستی بەوان نییە“.
ئەو نووسەرە ئاماژە دەدات، كە ماوەیەكی تر سوپای توركیا هێرشی گەورەتر ئەنجام دەدات، بۆیە تا زووە با كۆتایی بە سوپای سووریای ئازاد بهێنرێت و ئەو سووكایەتییە رابگیرێت.
پێشتریش چەند نووسەرێكی دیاری توركیا هەمان داواكارییان هەبوە و، پێیان وابوە بۆ سومعە و ناوبانگی توركیا خراپە ئەو سوپایە بكاتە پێشڕەوی خۆی لە شەڕدا.
یڵماز ئۆزدیل بۆ هەمان رۆژنامەی وتارێكی نووسیوە و، دەڵێت هەرگیز نابێت قبوڵ بكرێت سوپایەكی لەوشێوەیە لەریزی سوپای توركیا شەڕ بكات، لەوەش ناخۆشتر حكوومەت ناوی لەو سوپایە ناوە (سوپای میللی توركیا).
ئەگەرچی لە زۆربەی میدیاكانی جیهانی وەحشییەت و دڕەندەیی و تاڵانچییەتی ئەو سوپایە باس دەكرێت و بە ڤیدیۆ بڵاودەكرێتەوە، كە هیچ جیاوازییەكیان لەگەڵ داعشدا نییە، بەڵام حكوومەتی توركیا بە هەموو شێوەیەك قەدەغەی كردوە لە میدیاكانی توركیاوە باس لە وەحشییەتی ئەو سوپایە بكرێت و هەر تەلەڤزیۆنێكیش باس لە وەحشییەتی ئەو سوپایە بكات رووبەڕووی سزای توند دەبێتەوە.
چەند رۆژێك بەر لە ئێستاش نووسەری دیاری رۆژنامەی (حوریەت)_ی توركی (ئێرتوغرول ئۆزكۆك)، بە هەمان شێوە داوای كرد توركیا دەست بەرداری ئەو سوپایە بێت، چونكە لە دنیادا ئەو سوپایە وەكو تیرۆرست مامەڵەی لەگەڵدا دەكرێت و نموونەی عەفرینی هێنایەوە كە دوای داگیركردنی ئەو شارە دەستیان بە تاڵانی و كوشتن كرد.
ئۆزكۆك داوای لە حكوومەت كرد هەرچی زووە ئەو سوپایە لە شەر بكشێنێتەوە، چونكە بۆ توركیا و میللەتی توركیا خراپە سوپایەكی لەو شێوەیە پێشڕەویان بێت.
بە گوێرەی ئەو زانیارییانەی لە چەند میدیایەكی توركیا بڵاوكراوەتەوە، دوای ئەوەی سوپای سووریای ئازاد چەند كوردێكی سڤیلیان لە نزیك سەرێ كانی بە دیل گرت و پاشان گوللەبارانیان كردن، حكوومەتی توركیا بە فەرمی لێیانی قەدەغە كردوە كە وێنەی دیلەكان بگرن و بڵاوی بكەنەوە.

 

كارزان گلی ـ هه‌ولێر

© 2017 Hawler