تشرینی یەکەم 21, 2020

سەرۆكی گەورەترین پارتی ئۆپۆزسیۆنی توركیا مەترسی دەستگیركردنی لەسەرە

بە هۆی ئەوەی جەهەپە كە گەورەترین پارتی ئۆپۆزسیۆنی توركیایە، زۆر لە هەدەپە نزیكبوەتەوە و وەكو پارتەكانی تری توركیا بە تیرۆرست ناوەزەندی ناكات، بۆیە كەمال كلیچدارئۆغلو سەرۆكی جەهەپە مەترسی دەستگیركردنی لەسەرە.

دەوڵەت باخچەلی سەرۆكی مەهەپە، لە وتارێكدا كە لە پێگەی خۆی لە تویتەر بڵاوی كردوەتەوە، باس لە پەیوەندی نێوان هەدەپە و جەهەپە دەكات، كە ئەو بە پەیوەندییەكی مەترسی دەزانێت بۆ ئاییندەی توركیا.
باخچەلی داوا لە پەرلەمان و حكوومەت دەكات، پارێزبەندی لەسەر كلیچدارئۆغلو هەڵبگیریت و پاشان دادگایی بكرێت، چونكە پێی وایە پەیوەندییەكانی جەهەپە لەگەڵ هەدەپە زۆر شاراوەیە و بە ئاشكرا داكۆكی لە تیرۆر دەكەن.
ئەكەپە لە رێگەی میدیاكانی خۆیەوە پشتگیری لەو داوایەی باخچەلی دەكات، بەڵام بە شێوەیەكی فەرمی پێشوازی لەو داواكارییە نەكردوە، وەكو ئەوەی چەند میدیایەكی توركیاش باسی دەكەن، ئەگەری دەستگیركردنی زۆر لاواز نییە.
بۆ ئەوەی كلیچدارئۆغلو دادگایی بكرێت، پێویستە لەناو پەرلەمانی توركیا پارێزبەندی لەسەر هەڵبگیرێت، چونكە ئەو بە یاسا پارێزبەندی هەیە. بۆ هەڵگرتنی ئەو پارێزبەندیەش پێویستیان بە ٤٠٠ دەنگ هەیە لە كۆی ٦٠٠ ئەندام پەرلەمان، ئاشكراشە مەهەپە و ئەكەپە بە هەروكیانەوە ناتوانن ئەو رێژە دەنگە كۆ بكەنەوە.
بەڵام بۆ ئەوەی بتوانرێت پارێزبەندی لە كلیچدارئۆغلو وەربگیرێت، ئەكەپە و مەهەپە پێویستیان بە دەنگی هەدەپە هەیە، هەروەكو چۆن كاتێك پارێزبەندی لەسەر ٥٥ ئەندام پەرلەمانی هەدەپە هەڵگیرا جەهەپە پشتگیری لە ئەكەپە و مەهەپە كرد، بە هەمان شێوە ئێستا ئەكەپە بۆ هەڵگرتنی پارێزبەندی لە كلیچدارئۆغلو پێویستی بە دەنگی هەدەپە هەیە تا بتوانێت ٤٠٠ دەنگ لە پەرلەمان كۆ بكاتەوە.
لە ٢٠١٦ لەناو پەرلەمانی توركیا بە دەنگی جەهەپە و ئەكەپە و مەهەپە پارێزبەندی لەسەر ٥٥ ئەندام پەرلەمانی هەدەپە هەڵگیرا، كە لەناویاندا هەردوو هاوسەرۆكی هەدەپە (سەلاحەدین دەمیرتاش و فیگەن یوكسەكداغ)_ی تێدابوو و دەستگیر كران، بۆیە ئەگەر هەدەپە بیەوێت تۆڵە لە جەهەپە بكاتەوە، دەتوانێت دەنگ بە هەڵگرتنی پارێزبەندی لەسەر كلیچدارئۆغلو بدات و ئەویش بنێردرێتە لای دەمیرتاش لە زیندانی ئێدیرنە.
ماڵپەری (سۆڵ)_ی توركی بڵاوی كردوەتەوە، رەنگە هەدەپە بیر لە تۆڵە نەكاتەوە، چونكە ئەگەر كلیچدارئۆغلو دەستگیر بكرێت، ئۆپۆزسیۆنی توركیا لاواز دەبێت، ئەمەش لە بەرژەوەندی هەدەپە نابێت.
جگە لەوەش، ئەگەر كلیچدارئۆغلو زیندانی بكرێت یاخود دادگایی بكرێت، بە هۆی نزیكبوونەوەیەتی لە هەدەپە و تۆمەتباری دەكەن بەوەی بە نهێنی بەرنامەی پەكەكە جێبەجێ دەكەن، بۆیە هەدەپە بیر لەوە ناكەتەوە پاڵپشتی لە دەستگیركردنی بكات.
ئەگەر ئەكەپە و مەهەپە نەیانتوانی لەناو پەرلەمانی توركیا ٤٠٠ ئەندام پەرلەمان كۆ بكەنەوە، دەتوانن هەڵگرتنی پارێزبەندی لە كلیچدارئۆغلو بخەنە ریفراندۆمەوە و رای خەڵكی توركیای لەسەر وەربگرن، كە ئەمەش زەحمەتییەكی زۆری دەوێت و بودجەیەكی زۆریشی دەوێت، چونكە هیچ جیاوازییەكی نییە لەگەڵ هەڵبژاردن و دەبێت كۆمیسیۆنی باڵای هەڵبژاردنەكانی توركیا چاودێری ئەو پڕۆسەیە بكات.

 

كارزان گلی ـ هه‌ولێر

© 2017 Hawler