ئەیلول 21, 2019

"ئەحمەد تورك كەسێكی تیرۆرست نییە"

چەند هەفتەیەك بەر لە ئێستا وەزارەتی ناوەخۆی توركیا، بە تۆمەتی ئەوە ئەحمەد تورك سەرۆكی شارەوانی مێردین بە نهێنی هاوكاری پەكەكەی كردوە لە سەرۆكی شارەوانی دووری خستەوە، بەڵام گەورە راوێژكاری سەرۆك كۆماری توركیا پێی وایە ئەحمەد تورك هیچ پەیوەندییەكی بە تیرۆرەوە نییە.

بولەنت ئارینج گەورە راوێژكاری رەجەب تەییب ئەردۆغان سەرۆك كۆماری توركیا، لە دیمانەیەكیدا لەگەڵ كەناڵی (خەبەر تورك) دەڵێت ئەحمەد تورك تیرۆرست نییە.
ئەو دەڵێت: ”لەبارەی ئەحمەد توركەوە تەنیا ئەوەندە دەڵێم كە دەیناسم و رێزی زۆرم بۆی هەیە، ئەوەی لەسەرمە لەبارەی ئەو مرۆڤەوە بیڵێم ئەوەیە كە هیچ پەیوەندییەكی بە تیرۆرەوە نییە. ئەو كەسێكە بەردەوام داوای ئاشتی دەكات“.
ئارینج لەبارەی ئەو سزایەی دادگای ئیستەنبۆڵ بەسەر جانان كەفتانجیئۆغلو سەرۆكۆ لقی ئیستەنبۆڵی جەهەپەی سەپاند، بە هۆی ئەوەی ٦ ساڵ بەر لە ئێستا لە چەند توێتێكدا سووكایەتی بە ئەردۆغان كردوە، بریارەكەی پێ باش نییە و لەگەڵ زیندانی كردنی نییە.
لەوڕوەشەوە دەڵێت: ”من دوور و نزیك باس لە باشی و خراپی ئەو بڕیارە ناكەم، بەڵام دەكرێت ئێمە جانانمان خۆش نەوێت و ئەو توێتانەشی كردویەتی هیچیانمان بە دڵ نەبێت و لەگەڵی نەبین، بەڵام دەبێت رێز لە ئازادی بیر و را بگرین و دەبێت تەحەمولمان هەبێت“.
باسی لەوەش كرد، كە ئەو لەگەڵ ئەوەدایە نییە جانان دەستگیر بكرێت، چونكە ئەمە كۆمەڵگای توركی توڕە دەكات.
ئەم گوتانەی ئارینجیش چەند سەركردەیەكی ناو مەهەپەی توڕە كردوە، كە مەهەپە هاوپەیمانی ئەكەپەیە و ٢ هەڵبژاردنە لە چوارچێوەی هاوپەیمانی (كۆماری) دەچنە ناو هەڵبژاردنەوە.
عیدایەت وەهابئۆغلو جێگری سەرۆكی كەهەپە، لە پێگەی خۆی لە تویتەر هێڕشی كردوەتە سەر ئارینج و دەنووسێت: ”بەداخەوە بۆ تۆ بولەنت ئارینج كە خاوەن هەڵوێستێكی لەو شێوەیەی“.
هەروەها یڵدرای چیچەك راوێژكاری رۆژنامەوانی مەهەپە، ئەویش هێرشی كردوەتە سەر ئارینج و دەڵێت ئیدی باس كردن لەوەی پەكەكەش تیرۆرستە نابێتە تاوان.
چیچەك لە پێگەی خۆی لە تویتەر نووسیویەتی: ”ئیدی ئەگەر بڵێین بەڕێز عەبدوڵا ئۆجەلانیش نابێتە تاوان، ئەگەر پەكەكە بە ئاڵای خۆیەوە بسوڕێتەوە لە توركیا نالێین تیرۆرستن. گوتەكانی ئارینج ئەمە دەگەیەنێت“.
بولەنت ئارینج یەكێكە لە دامەزرێنەرانی ئەكەپە، بەڵام لە ٢٠١٦ بە بڕیاری ئەردۆغان لە پۆستی جێگری سەرۆك وەزیرانی توركیا دوور خرایەوە و بۆ ماوەیەكی زۆر هیچ پۆستێكی پێ نەدرا، تا ٦ مانگ بەر لە ئێستا وەكو گەورە راوێژكاری سەرۆك كۆماری توركیا دەست بەكار بوو.

 

كارزان گلی ـ هه‌ولێر

© 2017 Hawler