ئاب 03, 2020

ئەحمەد داودئۆغلو، لە سەرۆك وەزیرانی توركیاوە بۆ سەركردەیەكی ئۆپۆزسیۆن

ئەحمەد داودئۆغلو سەردەمانێك دەستی راستی رەجەب تەییب ئەردۆغان بوو، بۆیە تا پۆستی سەرۆك وەزیرانی توركیا رۆیشت، بەڵام بە هۆی ئەوەی بە گوێی ئەردۆغانی نەدەكرد و نەدەكەوتە ژێر فەرمانەكانی، بۆیە لە بڕیارێكدا لە پۆستی سەرۆك وەزیرانی توركیا دوور خرایەوە.

ئەو بۆ ماوەی ٤ ساڵ بێدنگ بوو و هەر خۆی بە كەسێكی ناو خانەوادەی ئەكەپە دەزانی، بەڵام دوای ئەوەی بێئومێد بوو لەوەی ئەردۆغان هیچ پۆستێكی پێ نادات، بۆیە وەكو سەركردەیەكی ئۆپۆزسیۆن خۆی ناساند و، سەرەتاش بە چەند وتارێك لە سۆسیال میدیا باسی لەو هۆكارانە كرد كە ئەكەپە لە هەڵبژاردنی شارەوانییەكانی توركیا شكستی هێنا و، پاشان رەخنەی لە سیستەمی سیاسی وڵات گرت، بەوەی دەسەڵاتەكان دراوەتە یەك كەس، كە مەبەستی ئەردۆغان بوو.
داودئۆغلو ئێستا وەكو كەسایەتییەكی ئاگتیڤ دەركەوتوە، دەیەوێت پارتێكی تازە لە مانگی ٩ی ئەمساڵدا دابمەزرێنێت، بۆیە بەردەوام خەریكی میتینگ و وتار و كربوونەوەیە، بەڵام ئەردۆغان دەیەوێت بەر لە داكبوونی پارتە تازەكەی بیتوێنێتەوە و رێگری لێ بكات.
ئەحمەد داودئۆغلو سەرۆك وەزیرانی پێشووی توركیا، بە هۆی ئەوەی لە وتار و میتینگەكانیدا دژایەتی ئەكەپە دەكات و رەخنەی توند لە رەجەی تەییب ئەردۆغان دەگرێت، بۆیە لە زۆربەی كەناڵە تەلەڤزیۆنی و رۆژنامەكانی توركیا سانسۆر كراوە.
داودئۆغلو بە نیازە لە مانگی ٩ی ئەمساڵدا پارتە تازەكەی رابگەیەنێت، بەڵام هەر لە ئێستاوە ئەردۆغان بە خیانەتكار ناوی دەبات.
ئەردۆغان لە وتاری پێرێیدا وەكو ئاماژەیەك بۆ داودئۆغلو گوتی: ”گوێ مەدەنە ئەو كەسانەی دەیانەوێت پارتێكی تازە دابمەزرێنن، ئەوان خائینن و دەبێت باجی ئەوەش بدەن“.
رۆژنامەی (سۆڵ)_ی توركی بڵاوی كردبوەوە، كە داودئۆغلو بە نیازە لە مانگی ٩ گرنگی زۆر بە میدیا و میتینگ بدات بۆ ناساندنی ئامانج و ستراتیژییەتی پارتە تازەكەی، بەڵام لە یەكەم هەنگاویدا شكستی هێنا.
لە ٢ هەفتەی رابردوودا، ٣ رۆژنامەنووسی بەناوبانگی توركیا دیمانەیەكی رۆژنامەوانیان لەگەڵ داودئۆغلو ئەنجامدا، ئەگەرچی دیمانەكە لە یوتوبی تایبەت بەو ٣ رۆژنامەنووسە بڵاوكرایەوە، چونكە هیچ میدیایەكی توركیا ئامادە نەبوە دیمانەكە پەخش بكات، بەڵام ئەو ٣ رۆژنامەنووسە لە كارەكەیان دوور خرانەوە، كە ماڵپەری (سپوتنیك)_ی روسی بوو بەشی توركی. هۆكارەكەشی ئەو دیمانەیە بوە و بەرێوەبەڕی ماڵپەڕ گوتویەتی بە هۆی ئەو دیمانەیەوە كۆتاییمان بە كارەكانتان هێنا و بڕۆنەوە ماڵەوە.
بە گوێرەی ئەو زانیارییانەی لە میدیاكانی توركیا بڵاوكراونەتەوە، ئەرۆدغان فەرمانی بە میدیاكانی سەر بە ئەكەپە و میدیا سێبەرەكانی خۆی كردوە، كە ٩٠٪ی تەواوی میدیای توركیا پێك دەهێنن، بە هیچ شێوەیەك دیمانە لەگەڵ داودئۆغلودا نەكەن و سانسۆری بكەن.
ئەحمەد داودئۆغلو لە پێگەی خۆی لە تویتەر نووسیویەتی: ”هەر دەرگایەكمان لەسەر دابخەن ئێمە لە دەرگایەكی ترەوە دێنە ژوورە و ناتوانن بێدەنگمان بكەن“.
شەڕی ئەردۆغان و داودئۆغلو لە مانگی ٩ دا زیاتر تۆخ دەبێتەوە، چونكە داودئۆغلو پارتە تازەكەی دادەمەزرێنێت و هەر لە ئێستاشەوە ئۆپۆزسیۆنی خۆی راگەیاندوە.
داودئۆغلو لە چەندین دیمانەدا گوتویەتی ئەو لەگەڵ سیستەمی سەرۆكایەتیدا نییە بۆ توركیا، بۆ كار دەكات تا سیستەمی پەرلەمانی بەهێز بێت، ئەمەش بۆچوون كاركردنی جەهەپە و پارتی باش و هەدەپەیە، بۆیە پارتە تازەكەی داودئۆغلو لەوڕوەوە لەبەرەی ئۆپۆزسیۆن دەبێت بۆ دژایەتیكردنی سیستەمی سەرۆكایەتی.
رۆژنامەكانی سەر بە ئەكەپەش وەكو (یەنی شەفەق، ئاكید، تەقویم)، بڵاویان كردوەتەوە، كە هێنانەوەی سیستەمی پەرلەمانی دەستی دەرەكی و پیلانی گولەن و پەكەكەیە، بۆیە جەهەپە و پارتی باش لەسەر فەرمانی ئەوان ئەو هەنگاوەیان گرتوەتە بەر.
چەند رۆژێك بەر لە ئێستا رەجەب تەییب ئەردۆغان سەرۆك كۆماری توركیا، لە وتارێكدا هێرشی توندی كردە سەر ئەحمەد داودئۆغلو و عەلی باباجان، كە هەردووكیان بە نیازن بە تەنیا پارت دروست بكەن. ئەردۆغان هەردوكیانی بە خائین ناو برد و گوتی گوێیان پێ مەدەن كە پارت دروست دەكەن، ئەوان خیانەتیان كردوە و دەبێت باجەكەشی بە قورسی بدەن.
ئەمڕۆ ئۆرهان ئۆغورئۆغلو كە رۆژنامەنووسێكی نزیك لە عەبدوڵا گویل و ئەحمەد داودئۆغلوە، لە وتارێكدا رەخنەی توند لە ئەردۆغان دەگرێت.
ئۆرهان بۆ رۆژنامەی (یەنی چاغ)_ی توركی نووسیوە و پرسیار لە ئەردۆغان دەكات، كە ئەگەر سزای باباجان و داودئۆغلو بدات بە هۆی ئەوەی بە جیا پارتێكی تازە دروست دەكەن وەكو ئەوەی خۆی باسی دەكات، ئاخۆ سزایەكە سیاسی دەبێت یان یاسایی؟
نووسەر باس لە وشەی (خیانەت) دەكات كە ئەردۆغان بەرامبەر بە داودئۆغلو و باباجان بەكاری هێنا و، دەنووسێت: ”ئەوكاتەی تۆ لە پارتی رەفاح جیا بویتەوە و پاشان ئەكەپەتان دروست كرد، ئایە ئێوەش خیانەتان لە نەجمەدین ئەربەكان كرد؟ كە ئەوكات ئەو سەرۆكی پارتی رەفاح بوو“.
ماوەی هەفتەیەك دەبێت میدیاكانی سەر بە ئەكەپە بە توندی رەخنە بە داودئۆغلو و باباجان دەگرن، هەروەها بەشێك لەو میدیایانە پێیان وایە ئەردۆغان ئەو ٢ سەركردەیە دەستگیر دەكات و تۆمەتی ئەوەیان دەداتە پاڵ كە سەر بە فەتحوڵا گولەنن و بە نهێنی كار بۆ ئەوان دەكەن.
رۆژنامەی (یەنی شەفەق)_ی توركی كە سەر بە ئەكەپەیە، ئەو ٢ سەركردەیە تۆمەتبار دەكات بەوەی بە پاڵپشتی گولەن و ئەمریكا و بەریتانیا پارت دروست دەكەن بۆ لێدان لە دەوڵەتی توركیا.

© 2017 Hawler