تەمموز 18, 2019

مەهەپە دەیەوێت بنكەی جەماوەری ئەكەپە بۆ خۆی رابكێشێت

مەهەپە ئەو پارتە نەژادپەرستەی ماوەی ٣ ساڵ دەبێت خۆی كردوە بە هاوپەیمانی ئەكەپە، بە نیازە بنكەی جەماوەری ئەكەپە بۆ خۆی رابكێشێت و، واش خۆی نیشان بدات كە هەموو سەركەوتنەكانی ئەكەپە بەبێ مەهەپە بوونی نابێت. ئەمەش بە گوتەی ئەندام پەرلەمانێكی پێشووی ئەكەپە.

ئەیهان سەفەر ئوستون ئەندام پەرلەمانی پێشووی ئەكەپە، لە دیمانەیەكیدا لەگەڵ رۆژنامەی (دیوار)_ی توركی، هەڵسەنگاندنی بۆ هاوپەیمانی نێوان (ئەكەپە و مەهەپە) كرد.
ئەو پێی وایە، لە پروپاگندەی هەڵبژاردنی شارەوانییەكانی توركیا، مەهەپە تەنانەت ٣ میتینگی ئەنجام نەدا و هەموو میتینگەكان ئەكەپە ئەنجامی دا، كەچی ویستی پارێزگاری لە دەنگەكانی خۆی بكات، ئەمەش بە چوونی بۆ ناو ئەو هاوپەیمانییەی بە ناوی (كۆمار) لەگەڵ ئەكەپەدا پێكیهێنابوو.
مەهەپە لە هەڵبژاردنی ٢٤ی حوزەیران توانی بەربەستی هەڵبژاردن بشكێنێت، بەڵام لەو كاتەوە بنكەی جەماوەری ئەو پارتە بەرەو داكشان چوە، تەنانەت ٣ هەڵبژاردنە هەدەپە توانیویەتی دەنگەكانی لە مەهەپە زیاتر بێت.
زۆرێك لە بەرپرسانی ئەكەپە شكستی پارتەكەیان لە هەڵبژاردنی شارەوانی توركیا دەگێڕنەوە بۆ ئەو هاوپەیمانییەی لەگەڵ مەهەپە بەستویانە، چونكە دەنگی كوردەكانیان لە دەستدا، بە تایبەت لە ئیستەنبۆڵ و ئەنكەرا. ئەمە جگە لەوەی بە گوێرەی زانیارییەكان ٣٠٪ی دەنگدەری مەهەپە دەنگیان بە كاندیدی هاوپەیمانی كۆماری نەداوە، كە بیناڵی یڵدرم بوو.
ئەگەرچی زۆرێك لە بەرپرسانی ئەكەپە لەگەڵ ئەوەدان هاوپەیمانی لەگەڵ مەهەپەدا هەڵبوەشێننەوە، بەڵام ئەمە بە لای رەجەب تەییب ئەردۆغانەوە هێڵی سوورە، چونكە لەناو پەرلەمان ئەكەپە بە تەنیا زۆرینە نییە و بە هەڵوەشاندنەوەی هاوپەیمانی لەگەڵ مەهەپە زۆرینە لە دەست دەدات.
وەكو ئەوەی چەند سیاسەتمەدارێك باسی لێوە دەكەن، دەكرێت هاوپەیمانی مەهەپە و ئەكەپە وەكو خۆی بمێنێتەوە، بەڵام چاوی پێدا بخشێندرێتەوە. بۆ نموونە دەكرێت لەبارەی پرسی چارەسەری لە توركیا، كە پێشبینی دەكرێت لە مانگی ئەیلوولی ئەمساڵ بێتەوە بەرباس، مەهەپەش رۆڵی پێ بدرێت و ئەویش بڕوای بە چارەسەركردنی كێشەی كورد هەبێت، واتە پێشووتر مەهەپە دژی چارەسەركردنی كێشەی كورد بوو، بەڵام دەركەوت بە بێ دەنگی كورد هاوپەیمانی (كۆماری) لاواز دەبێت، بۆیە بۆ مانەوەی ئەو هاوپەیمانییە، پێویستە ئەویش نەرم بێت و بڕوای بە چارەسەركردنی كێشەی كورد هەبێت.
لە لایەكی ترەوە، رۆژنامەی (سۆڵ)_ی توركی ئاشكراری دەكات، مەهەپە و ئەكەپە دەیانەوێت پارێزگاری لە سیستەمی كۆماری بكەن بۆ توركیا، بەڵام بەبێ كورد و نزیكبوونەوە لە كورد ناتوانن تا سەر ئەو هاوپەیمانییە و ئەو سیستەمە بپارێزن، چونكە ئۆپۆزسیۆنی توركیا بە نیازە بۆ هەڵبژاردنی داهاتوو بێتە سەر كورسی دەسەڵات و، ئیدی ئۆپۆزسیۆنبوون جێ بهێڵێت، بەمەش سیستەمی پەرلەمانی بەهێز دەكەن.

 

كارزان گلی ـ هه‌ولێر

© 2017 Hawler