حوزەیران 17, 2019

ڕاپۆرتە نێودەوڵەتیەکان بەبایەخەوە له‌ ئاڵوگۆڕە دیموکراتییەکانی هەرێمی کوردستان دەڕوانن

ڕۆژی دووشەممە (١٠ی حوزەیرانی ٢٠١٩)لەڕێوڕەسمێکی شکۆداردا بەبەشداری جەنابی سەرۆک (مەسعود بارزانی) و، ژمارەیەکی زۆر لە سەرۆک و سەرکردە و نوێنەرە سیاسی و دیبلۆماتیە ناوخۆیی و نێودەوڵەتیەکان بەڕێز (نێچیرڤان بارزانی) وەکو سەرۆکی هەرێمی کوردستانسوێندی یاسایی خوارد.

ئەو دووەم سەرۆکی هەرێمی کوردستانە لەدوای جەنابی سەرۆک (مەسعود بارزانی) کە لەدوای ڕووخانی ڕژێمی پێشوی عێراق و لەنێو عێراقی نوێی فیدڕاڵدا لەساڵی (٢٠٠٥) دا وەکو یەکەم سەرۆکی هەرێمی کوردستان هەڵبژێردرا، ئەو پۆستە کە گەورەترین دەسەڵاتی هەرێمی کوردستانە (نێچیرڤان بارزانی) دووەم کەسە کە ئەو دەسەڵاتە وەردەگرێت.
ڕاپۆرتە نێودەوڵەتیەکان بەبایەخەوە تەماشای ئاڵۆگۆڕییە دیموکراتیەکان لەشێوەی حوکمڕانی دەسەڵاتی هەرێمی کوردستان دەڕوانن، وە بەها گرنگەکانی حکومەتی هەرێمی کوردستان لەڕابردوو و ئێستادا لە تەبایی و، ئاشتی و، سەقامگیری و، پێشکەوتن و، پێکەوەژیان و، ڕووبەڕووبونەوەی تیرۆریستان بەگرنگیەوە باسدەکەن، وە بۆ ئایندەش (نێچیرڤان بارزانی) سەرۆکی هەرێمی کوردستان بەهەوێنی باشترکردنی پەیوەندییەکانی نێوان بەغدا و هەرێم دەزانن و، وە لەسەر ئاستی جیهانیش بە کەسایەتیەکی گرنگ و ناسراوی دیبلۆماتی و سیاسی و بەهێزتەماشادەکرێ.
لەڕاپۆرتێکی (ڕۆیتەرز) دا هاتوە، (نێچیرڤان بارزانی) ڕۆژی دووشەممە وەکو سەرۆکی هەرێمی کوردستان کە بەهێزترین دەسەڵاتی هەرێمی کوردستانە سوێندی خوارد.
هەشت مانگ پێش ئێستا پارتەکەی بارزانی لەهەڵبژاردنە گشتیەکان سەرکەوتنی بەدەستهێنا، وە نێچیرڤان بارزانی لەمانگی ڕابردوودا لە پەرلەمانی کوردستان هەڵبژێردرا و متمانەی پەرلەمانی بۆ سەرۆکی هەرێمی کوردستان بەدەستهێنا.
ڕێوڕەسمی سوێندخواردنەکە مێژوویی و گەورە بوو، بەبەشداری و ئامادەبوونی (بەرهەم ساڵەح) سەرۆککۆماری عێراق و، (محمد حەلبوسی) سەرۆکی پەرلەمانی عێراق و، چەندین سەرکردەی ناوخۆ و، دەرەوە و، باڵوێز و کونسوڵەکان بەڕێوەچوو.
هەر لەسەر ئەو بابەتە لەڕاپۆرتێکی (زە ناشناڵ) دا هاتوە، ڕۆژی دووشەممە سوێندخواردنی (نێچێرڤان بارزانی) سەرۆکی هەرێمی کوردستان لە هەولێر بەڕێوەچوو وەکو بەشێک لە هەوڵەکان بۆ تەواوکردنی پێكهێنانی کابینەی نوێ.
سەرۆکی نوێی هەرێمی کوردستان لەکاتی سوێند خواردنەکەدا گوتی، سوێندبێ بەخوای مەزن پارێزگاری لە مافەکان و دەستکەوتەکان و یەکڕیزی و بەرژەوەندییەکانی هاوڵاتیانی هەرێمی کوردستان بکەم و ئەرک و فەرمانەکانم بەدروستی و دڵسۆزی ئەنجامبدەم خوای گەورە پشتیوان بێت.
هەر لەڕاپۆرتەکەدا ئاماژەی بە وتەی (بەرهەم ساڵەح) سەرۆککۆماری عێراقداوە لەڕێوەڕەسمی بۆنەکەدا کە دەڵێت بۆنەیەکی مێژوویی و گرنگە و هیوادارین ببێتە سەرەتای قۆناخێکی نوێی پێشكەوتن و، ئاشتەوایی و ئاوەدانی بۆ کوردستان و بۆ عێراق.
لەبەشێکی دیکەدا هاتوە، بەڕێز (بارزانی) کەسایەتیەکی بەهێز و کاریگەری پارتی دیموکراتی کوردستانە، ئەو برازای (مەسعود بارزانی) سەرۆکی پێشوی هەرێم و، سەرۆکی پارتی دیموکراتی کوردستانە، کە تەمەنی (٥٢) ساڵە و خزمەتی کردوە وەکو سەرۆکوەزیرانی هەرێمی کوردستان لەوەتەی ساڵی (٢٠٠٦) ەوە، خانەوادەی بارزانی لەڕێرەو و بزوتنەوەی ڕزگاریخوازی و سیاسی کوردستاندا بۆ چەندین نەوەیە ڕۆڵی سەرەکیان هەیە.
هەروەها نوسیویەتی، (نێچیرڤان بارزانی) سەرۆکی هەرێمی کوردستان لەلایەن زۆربەی خەڵکی هەولێرەوە بە سەرکردەیەکی کاریگەر تەماشادەکرێ کە دەتوانێ ڕۆڵی سەرەکی بگێڕێت لە دامرکاندنەوە و چارەسەرکردنی گرژییەکان لەگەڵ حکومەتی ناوەندی بەغدا و، گەیاندنی سەقامگیری و خۆشگوزەرانی بۆ هاوڵاتیان لەناوچەکەدا.
لەماوەی ئیدارەی ڕابردووی بەغدادا پەیوەندییەکانی نێوان هەرێمی کوردستان و بە‌غدا بەئاستێکی خراپدا تێپەڕین، کە لەدوای ڕیفراندۆمی گەلی کوردستان بۆ سەربەخۆیی تێكچونی لێکەوتەوە. ئیدارەی پێشوی بەغدا بەسەرۆکایەتی (حەیدەر عەبادی) پەیوەندییەکانیان لەگەڵ هەرێم تێكچون و حكومەتی ناوەندی فیدڕاڵ لەدوای ڕیفراندۆم لەساڵی (٢٠١٧) ەدا سزای خستە سەر هەرێمی کوردستان و هێزی سەربازی ناردە سەر هێزە کوردییەکان.
ئەگەرچی لەماوەی دەسەڵاتی ڕابردووی بەغدا پەیوەندییەکان بەئاقاری تێكچوندا تێپەڕین بەڵام لەژێر دەسەڵاتداریەتی ئێستای حکومەتی ناوەندی بەغدادا کە (عادل عەبدولمەهدی) سەرۆکوەزیرانیەتی هەردوولا هەرێم و بەغدا پەیوەندییەکانیان باشترکردون و، چاوەڕێدەکرێ لەدوای پێکهێنانی کابینەی وەزیرانی هەرێم ئاستی پەیوەندییەکان باشتر ببن و، ویستی بەرچاو دەبینرێ بۆ ئەوەی چارەسەری کێشەکانیان بکەن.
لەڕاپۆرتێکی دیکەدا لە (ئەلعەرەبیەی ئینگلیزی) دا هاتوە، لەوتارەکەی (نێچیرڤان بارزانی) سەرۆکی هەرێمی کوردستاندا ئاماژە بەهەوڵدان بۆ باشترکردنی پەیوەندییەکانی نێوان بەغدا و هەرێم هاتوە، بارزانی لەوتارەکەیدا داوای باشترکردنی پەیوەندییەکانی لەگەڵ دەسەڵاتی فیدڕاڵی لەبەغدا کرد و هەروەها گوتی لەکاری لەپێشینەی حکومەتیش باشترکردنی دامەزراوەکانی هەرێم دەبێت.
لەبەشێکی دیکەی ڕاپۆرتەکەی (ئەلعەرەبیە) دا هاتوە، (نێچیرڤان بارزانی) کە لەساڵی (١٩٦٦) دا لەباکوری عێراق دایک بوە، بەشێکی ژیانی لە ئێران بردۆتە سەر و زمانەکانی کوردی و فارسی و ئینگلیزی بەباشی دەزانێت. یەکێکە لەو کەسایەتیانەی کە لەدوای ڕزگارکردنی کوردستان لەساڵی (١٩٩١) دا ئەوە بۆ ماوەیەکی درێژە کاری سیاسی دەکات لەهەرێمی کوردستاندا، ئەو ماوەیەک خزمەتی کردوە وەکو جێگیری سەرۆکوەزیران و، دواتر سەرۆکوەزیران.
چاودێران دەڵێن (نێچیرڤان بارزانی) سەرۆکی هەرێمی کوردستان (مەسرور بارزانی) ڕاوێژکاری ئاسایشی هەرێمی کوردستان دەستنیشاندەکات بۆ پۆستی سەرۆکوەزیرانی هەرێمی کوردستان.
شیاوی باسکردنە، (نێچیرڤان بارزانی) ڕۆژی دووشەممە (١٠ی حوزەیرانی ٢٠١٩) وەکو سەرۆکی هەرێمی کوردستان سوێندی خوارد، ڕێوڕەسمەکە بەئامادەبوونی سەرۆک (مەسعود بارزانی) و (بەرهەم ساڵەح) سەرۆککۆماری عێراق و، (محمد حەلبوسی) سەرۆکی پەرلەمانی عێراق و، (مەولود چاوشئۆغلۆ) وەزیری دەرەوەی تورکیا و، (سامر سەبهان) وەزیری دەوڵەتی عەرەبستان بۆ کاروباری کەنداو، (عەممار حەکیم) سەرۆکی ڕەوتی حیکمە و، ژمارەیەکی زۆر و بەرچاو لە سەرکردە سیاسی و دیبلۆماتکارەکان لە ناوخۆی هەرێمی کوردستان و، لە عێراقی فیدڕاڵ و، باڵوێز و کونسوڵ ونوێنەرانی وڵاتانی جیهان و ناوچەکە بەڕێوەچوو.
لە وتاری سەرۆک و سەرکردەکاندا بەڕوونی ڕۆڵ و کاریگەری جەنابی سەرۆک (مەسعود بارزانی) بەگەورە و دیار لەقۆناخی ڕابردوو و، بۆ ئێستا و ئایندەش باسکرا. جەنابیان کە ساڵانێکی دوورودرێژی تەمەنی خەبات و تێکۆشانی کردوە و ڕۆڵی پێشمەرگە و، ڕابەر و، سەرکردایەتی شۆڕشی کوردی بینیوە و، بەهۆی حیکمەت و توانایی و، شارەزایی و، شەونخونی و، قوربایندانیەوە توانیویەتی هەرێمی کوردستان لەهەڕەشە و مەترسیەکان بپارێزێت و، سەقامگیری و خۆشگوزارەانی بۆ هاوڵاتیانی کوردستان و ناوچەکە دەستەبەربکات، دۆزی کوردی بگەێنێتە ئەو ڕەوشە پێشكەوتنەی ئەمڕۆی هەرێمی کوردستان.

© 2017 Hawler