کانونی دووەم 17, 2021

هەڵوێستی ئاكپارتی بەرامبەر بە كورد نەرمتر دەبێت

رەجەب تەییب ئەردۆغان سەرۆك كۆماری توركیا، پێیوایە ئەكرەم ئیمامئۆغلو كاندیدی جەهەپە و پارتی باش بۆ سەرۆكی شارەوانی ئیستەنبۆڵ لە ئاستی ئەودا نییە، بۆیە پێویست ناكات وەڵامی بداتەوە و لەگەڵیدا بكەوێتە قسە.

بۆ هەڵبژاردنی شارەوانی ئیستەنبۆڵ لە 23ی حوزەیران، ئەردۆغان بە هیچ شێوەیەك قسەكانی رووبەرووی ئەكرەم ئیمامئۆغلو ناكات، بەڵكو ئەو تەنیا رووبەرووی كەمال كلیچدارئۆغلو سەرۆكی جەهەپە دەبێتەوە.
عەبدولقادر سەلفی رۆژنامەنووسی نزیك لە ئەردۆغان، لە وتاری ئەمڕۆیدا كە لە رۆژنامەی (حوریەت)ـی توركی بڵاوی كردوەتەوە، باس لە گوتەیەكی ئەردۆغان دەكات لەبارەی ئیمامئۆغلوەوە.
سەلفی دەنووسێت: "ئەردۆغان گوتویەتی ئێمامئۆغلو لە ئاستی مندا نییە تا وەڵامی بدەمەوە، بەڵكو ئەوەی لە ئاستی ئەودایە و وەڵامی دەداتەوە كلیچدارئۆغلوە. ئەردۆغان گوتویەتی من قسە دەكەم كلیچدارئۆغلو وەڵامم دەداتەوە، ئەویش قسە بكات من وەڵامی دەدەمەوە".
وەكو ئەوەی سەلفی ئاماژەی بۆ كردوە، بۆ پروپاگندەی هەڵبژاردن، ئەمجارەیان ئەردۆغان وتەكانی زیاتر باوەش پیاكردنی هەموو پێكهاتە و لایەنەكانی توركیا دەبێت، ئەمجارەیان بە هیچ شێوەیەك زمانی توند بەكارناهێنێت.

ئاكپارتی و كوردانی ئیستەنبۆڵ
وەكو ئەوەی لە میدیاكاندا بڵاوكراوەتەوە، 200هەزار دەنگدەری كورد كە زۆربەیان موحافیزكارن لە ئیستەنبۆڵ نەچوونەتە سەر سندوقی دەنگدان، بۆیە لە لایەك هەدەپە و لە لایەكی تر ئاكپارتی چاویان بڕیوەتە ئەو دەنگانە و هەر لایەنە و دەیەوێت ئەو دەنگدەرانە بڕوا پێ بهێنێت تا لە بەرژەوەندی ئەوان دەنگ بدەن.
بۆ هەڵبژاردنی شارەوانییەكانی 31_3_2019 تەنیا 900 هەزار دەنگدەری كورد چوونە سەر سندوقی دەنگدان، لە كاتێكدا دەنگدەری كورد لەو شارە ملیۆنێك و 200 هەزارە. لەو رێژەیەی چوونەتە سەر سندوقی دەنگدان، لەسەر داوای هەدەپە زۆربەیان دەنگیان بە ئەكرەم ئیمامئۆغلو كاندیدی جەهەپە و پارتی باش داوە، بەڵام 200 هەزار دەنگدەری كورد كە زۆربەیان موحافیزكارن نەچوونەتە سەر سندوقی دەنگدان.
وەكو ئەوەی چەند شڕۆڤەكارێك باسی دەكەن، ئەو 200 هەزار دەنگدەرە لە ئاكپارتی توڕەن، چونكە بە زمانێكی زۆر توند رووبەرووی كورد و هەدەپە بوونەتەوە، بە جۆرێك هەموو كوردیان وەكو تیرۆرست ناساندوە، بۆیە ئەو موحافیزكارانە ویستویانە سزای ئاكپارتی بدەن.
جگە لەوەش هاوپەیمانی نێوان مەهەپە و ئاكپارتی یەكێك بوە لەو هۆكارانەی ئەو دنگدەرە كوردە موحافیزكارانە دەنگ بە ئاكپارتی نەدەن، چونكە مەهەپە پارتێكە بە هەموو شێوەیەك سووكایەتی بە كورد و نەتەوەكەی دەكات. بەڵام بۆ هەڵبژاردنی 23ی حوزەیران، ئاكپارتی ئاگاداری مەهەپەی كردوەتەوە بە هیچ شێوەیەك قسەی توند بەرامبەر بە كورد نەكات، بەڵكو دەبێت باوەشیان بۆ بكاتەوە و لێیان نزیك ببێتەوە، ئەمەش ستراتیژییەتێكی تازەی ئاكپارتییە بۆ راكێشانی دەنگی كوردەكان لە هەڵبژاردنی 23ی حوزەیراندا.
لەرووی ئابووریشەوە ئاكپارتی پلانی هەیە
نرخی هەموو شتێك لە توركیا بەرز بوەتەوە، بەهای لیرەی توركیش بەرامبەر بە دۆلار هاڕەی كردوە و دابەزیوە، بۆیە ئاكپارتی بۆی دەركەوت كە هۆكارێكی سەرەكی شكستی كاندیدەكەیان لە ئیستەنبۆڵ، خراپی رەوشی ئابووری خەڵك بوە.
بە گوێرەی زانیارییەكان، ئاكپارتی بە نیازە بە چەند رۆژێك بەر لە ئەنجامدانی هەڵبژاردنی شارەوانییەكان لە ئیستەنبۆڵ، نرخی زۆربەی كەلوپەلەكان هەرزان بكات، بە تایبەت نرخی میوە و سەوزە، چونكە بە رێژەیەكی زۆر بەرز بوەتەوە.
ئەم پلانەی ئاكپارتی بۆ ئەوەیە هاووڵاتییان لە خۆی نزیك بكاتەوە، چونكە دوای هەڵسەنگاندنی شكستی بیناڵی یڵدرم لە ئیستەنبۆڵ، دەركەوتوە هاووڵاتییان گیریان خواردوە بەدەست گرانی نرخی میوە و سەوزە و كەلوپەلەكانی تر، بۆیە روویان لە كاندیدی ئۆپۆزسیۆن كردوە و ویستویانە سزای ئاكپارتی بدەن.
هەروەها ئاكپارتی دەیەوێت بەر لە ئەنجامدانی هەڵبژاردن، بەهای لیرەی توركی بەرامبەر بە دۆلار بەرز بكاتەوە تا بۆ خەڵكی بسەلمێنێت تروسكاییەك هەیە بۆ چارەسەركردنی قەیرانی دارایی، بۆیە بەرات ئالبەیراك وەزیری دارایی توركیا گوتی: "لە كۆتایی تۆنێلەكەدا تروسكاییەكی گەورە خۆی نیشانمان دەدات".

 

كارزان گلی ـ هه‌ولێر

© 2017 Hawler