ئاب 19, 2019

راگەیاندنی پارتە تازەكەی داودئۆغلو نزیك بوەتەوە

لە سەردانیكردنی بۆ ئامەد و ئێوارە خوانێك لەگەڵ چەند كەسایەتییەكی ئەو شارە، ئەحمەد داودئۆغلو بە شێوەیەكی ناڕاستەوخۆ ئاماژەی بە دروستكردنی پارتێكی تازەدا. هەروها لە كۆبوونەوە نهێنییەكانی ئاكپارتیشدا باس لەوە كراوە دروستبوونی پارتە تازەكەی داودئۆغلو نزیك بوەتەوە.

داودئۆغلو لە 2014 بۆ 2016 سەرۆك وەزیرانی توركیا بوە لەسەر لیستی ئاكپارتی، بەڵام ئێستا باس لەوە دەكرێت لە ئاكپارتی جیا بێتەوە و پارتێكی تازە دابمەزرێنێت. وەكو ئەوەی باسیش دەكرێت دروست كردنی پارتەكەی لە ئامەدەوە رادەگەیەنێت.
ماڵپەڕی (DW)ـی ئەڵمانی لە راپۆرتێكدا ئاشكرای دەكات، داودئۆغلو كاركردنی لە دروست كردنی پارتە تازەكەی تەواو كردوە، جگە لەوەی چەند بەرپرسێكی گەورەی ناو ئاكپارتیشی لەگەڵدایە و بە نیازن بە یەكەوە پارتە تازەكەیان رابگەیەنن.
ئەو ماڵپەڕە ئاشكرای دەكات، جگە لە چەند ئەندام پەرلەمانێكی سەر بە ئاكپارتی و پارتەكانی تری توركیا، هەریەك لە محەممەد شیمشەك و جەودەت یڵماز كە پێشتر جێگری سەرۆك وەزیران بوونە هاوتای داودئۆغلون. هەر لە هەواڵەكەدا هاتوە، نوعمان كورتولموش كە یەكێكە لە دامەزرێنەرانی ئاكپارتی و پێشتر پلەی وەزیر و جێگری سەرۆك وەزیران بوە، ئەویش دێتە پاڵ پارتەكەی داودئۆغلو.

ئەردۆغان دەیەوێت داودئۆغلو دەربكات
ئەحمەد داودئۆغلو دوای ئەوەی لە ئاكپارتی زویر بوو و ئەردۆغانیش سڕی كرد، بە هیچ شێوەیەك لێداونی دژی ئەو پارتە نەدەدا، بەڵام دوای ئەنجامدانی هەڵبژاردنی شارەوانییەكانی توركیا لە 31_3_2019، داودئۆغلو بە نووسین و كۆبوونەوە و میتینگەكانی رەخنەی توند لە ئەردۆغان و ئاكپارتی دەگرێت، بەڵام هەر خۆی وەكو ئەندامێكی ئاكپارتی ناو دەبات.
عەبدولقادر سەلفی رۆژنامەنووسی نزیك لە ئەردۆغان، لە دیمانەیەكیدا لەگەڵ تەلەڤزیۆنی (CNN)ـی توركی، ئاماژەی دا كە سەركردایەتی ئاكپارتی بە نیازن ئەحمەد داوئۆغلو بە فەرمی لە ئاكپارتی دەربكەن، رەنگە ئەم بڕیارەش بكەوێتە دوای جەژنی رەمەزان.

ئامانجی داودئۆغلو كوردە موحافیزكارەكانە
وەكو ئەوەی ماڵپەڕی ناوبراو ئاماژەی بۆ كردوە، داودئۆغلو تیشك و قورسایی خۆی كردوەتە سەر باكووری كوردستان و دەیەوێت ئەو كوردە موحافیزكارانەی بێلایەنن و هەروەها ئەو كوردانەی پێشتر ئاكپارتی بوونە بۆ خۆی رابكێشێت. بۆ ئەم مەبەستە قورسایی و میتینگەكانی بردوەتە ئامەد و باتمان و بینگۆل، لەوێش خەڵكێكی زۆر پێشوازیان لێ كردوە و پشتگیرییان لێ كردوە.
وەكو ئەوەی باس دەكرێت و چاوەڕوان دەكرێت، داودئۆغلو بە نیازە پارتە تازەكەی لە ئامەد رابگەیەنێت، ئەمەش بۆ ئەوەی بیسەلمێنێت ئەو جیاوازی لە نێوان هیچ لایەنێك و پێكهاتەیەكدا ناكات. هەروەها لۆگۆی پارتەكەشی وەكو ئەوەی بڵاوكراوەتەوە، درەختێكە و 4 گەڵای بەسەردا شۆربوەتەوە و پشتی ئەو درەختەش رەنگی سپییە.

عەلی باباجان لەناو شەمەندەفەرەكەی داودئۆغلودا نییە
عەلی باباجان كە پێشتر وەزیری دەرەوە و دارایی توركیا بوە و لە سەركردایەتی ئاكپارتیدا بوە، رێگەی خۆی لە داودئۆغلو دابڕی و دەیەوێت بە تەنیا جموجۆڵی دروست كردنی پارتێكی تازە دابنێت. ئەو كەسایەتییەكی خۆشەویستە لای خەڵك و تەنانەت ئۆپۆزسیۆنیش، چونكە ئەوكاتانەی وەزیر بوە، ئۆپۆزسیۆن زۆر ل ئەدای زاری بوە.
وەكو ئەوەی باس دەكرێت، عەلی باباجان 35 ئەندام پەرلەمانی ئاكپارتی لەگەڵدایە و هەر كاتێك پارتێكی تازە رابگەیەنێت، ئەو 35 ئەندام پەرلەمان دەچنە پاڵ پارتەكەی ئەو.

 

كارزان گلی ـ هه‌ولێر

© 2017 Hawler