ئەم پەڕەیە چاپ بکە

ئەردۆغان بەربەستی بەردەمی لەناو پارتەكەی دەشكێنێت

ئەندامێكی سەركردایەتی جەهەپە كە لە هەمان كاتدا بەرپرسی لقی ئیستەنبۆڵی ئەو پارتەیە، پێیوایە ئەگەر بۆ جاری دووەم لە هەڵبژاردنی شارەوانییەكانی ئیستەنبۆڵ ئاكپارتی بیدۆڕێنێت، ئەوكات رەجەب تەییب ئەردۆغان دەسەڵاتەكەی بەرەو لاوازی دەچێت.

جانان كەنفتانجیئۆغلو سەرۆكی لقی ئیستەنبۆڵی جەهەپە، لە دیمانەیەكیدا بۆ رۆژنامەی (دیوار)ـی توركی ئاماژە دەدات، دووبارەكردنەوەی هەڵبژاردنی شارەوانییەكان هیچ مانایەكی نەبوو، چونكە ئێمە بردبومانەوە بەڵام زوڵمیان لێ كردین.
ئەو دەڵێت: "ئەگەر ئەمجارەیان ئاكپارتی بیدۆڕێنێتەوە، دەسەڵاتەكانی ئەرۆدغان بەرەو لاوازی دەچێت و ئاكپارتی بەرەو دابەشبوون و لەت بوون دەچێت. ئێمە دڵنیاین دەیبەینەوە، بۆیە دڵنیاین ئاكپارتی لاواز دەكەین و ئەردۆغانیش لاواز دەكەین".
باسی لەوەش كردوە، كە بڕیارەكەی كۆمیسیۆن بۆ دووبارە كردنەوەی هەڵبژاردن لە ئیستەنبۆڵ، كودەتایەك بوو بەسەر سندوقی دەنگدان.
گوتیشی: "ئیستەنبۆڵ جگە لەوەی لەرووی ئابووری و ئیدارییەوە گرنگە، لە هەمان كاتدا لەرووی سیاسییەوە مانایەكی گرنگی هەیە، چونكە هەر كەسێك و لایەنێك ئیستەنبۆڵ بباتەوە لە هەڵبژاردنی گشتیش دەیباتەوە، مێژووش ئەو راستییەی سەلماندوە. بۆ هەر سیاسییەك كە ئیستەنبۆڵی لە دەستدا، بەو مانایەیە كە بەرەو داڕوخان دەڕوات".

ئەردۆغان داوای دەست لەكار كێشانەوە لە چەند بەرپرسێك دەكات
دوای ئەوەی كۆمیسیۆنی باڵای هەڵبژاردنەكانی توركیا بڕیاریدا هەڵبژاردنی شارەوانییەكان لە ئیستەنبۆڵ ئەنجام بدرێتەوە، چەند بەرپرسێكی ناو ئاكپارتی رەخنەیان لەو بڕیارەی كۆمیسیۆن گرت، بۆیە رەجەب تەییب ئەردۆغان دەڵێت دەست لە كار بكێشنەوە.
رۆژنامەی (جومهوریەت)ـی توركی بڵاوی كردوەتەوە، ئەردۆغان لە كۆبوونەوەی لەگەڵ بەرپرسانی پارتەكەی لە ئەنكەرا، نیگەرانی خۆی پێ راگەیاندوون بەوەی رەخنەیان لە بڕیارەكەی كۆمیسیۆن گرتوە.
ئەردۆغان گوتویەتی: "من لە بۆچوون رەخنەكانی چەند ئەندامێكی پارتەكەم تێ ناگەم، كە رەخنەیان لە كۆمیسیۆن گرتوە و پێیان باش نەبوە هەڵبژاردن لە ئیستەنبۆڵ ئەنجام بدرێتەوە. مادام ئێوە وا بیر دەكەنەوە فەرموون دەست لە كار بكێشنەوە و واز لە پارت بهێنن".
بە گوێرەی چەند زانیارییەك كە دەست میدیاكان كەوتوە، ئەردۆغان بە نیازە چەند بەرپرسێكی پارتەكەی كە رەخنەیان لە بڕیارەكەی كۆمیسیۆن گرتوە دەر بكات، بەرپرسەكانیش بەشێكیان لە سەركردایەتی ئاكپارتین و كەسی ناسراون.
لەبارەی رەخنەكانی عەبدوڵڵا گویل و ئەحمەد داودئۆغلو كە لە كۆمیسیۆن و ئاكپارتییان گرتوە ئەردۆغان دەڵێت: "جارێ بەر لە هەر شتێك گویل ئەندامی ئاكپارتی نییە، چونكە ئەوكاتەی بوە سەرۆك كۆمار ئەندامییەتی لە پارت هەڵوەشایەوە و كە لە سەرۆكیش نەما نەمانكردەوە بە ئەندامی ئاكپارتی، هەروەها یەكێكیش نییە لە دامەزرێنەرانی ئاكپارتی. بەڵام لە رەخنەكانی ئەحمەد داودئۆغلو تێدەگەم و ئەو پێشتر سەرۆك وەزیرانمان بوە".
ئەردۆغان هەر لەو كۆبوونەوەیەدا هەڕەشەی كردوە، بەوەی با رەمەزان بڕوات و كۆتایی پێ بێت، دەزانێت چۆن رووبەرووی ئەو كەسانەی ناو پارتەكەی دەبێتەوە كە رەخنەیان لە بڕیاری كۆمیسیۆن گرتوە.
بە پێی زانیارییەكان، ئەردۆغان گوتویەتی پێویستە هەموو ئەندامانی ئاكپارتی دڵخۆش بن بە بڕیاری كۆمیسیۆن و واش لە خەڵكی بگەیەنن، كە كۆمیسیۆن بڕیارێكی گرنگ و عادیلانەی داوە، ئەوكات دەتوانن سەرۆكی شارەوانی ئیستەنبۆڵ ببەنەوە.

 

كارزان گلی ـ هه‌ولێر