ئایار 21, 2019

بە هۆی وتەیەكی وەزیری ناوخۆی توركیا، گەشتیاری ئەڵمانیا بایكۆتی توركیا دەكەن

بە هۆی ئەوەی وەزیری ناوەخۆی توركیا لە وتارێكدا هێرشی توندی كردە سەر ئەڵمانیا و، ئاماژەی دا كە زۆرێك لە گەشتیاری ئەڵمانی بەشداری لە كۆبوونەوەی تیرۆرستان دەكەن و پاشان دێنە توركیا بۆ كات بەسەر بردن، بۆیە ئیتر بۆیان ناچێتە سەر. بە هۆی ئەم گوتەیەوە رۆژانە سەدان گەشتیاری ئەڵمانی بایكۆتی توركیایان كردوە.

ماڵپەڕی (رۆیتەرز) بڵاوی كردوەتەوە، هاتنی گەشتیاری ئەڵمانی بۆ توركیا زۆر كەمی كردوە، هۆكارەكەشی ئەو وتارە بوە كە سولەیمان سویلو وەزیری ناوەخۆی توركیا لەبارەی گەشتیاری ئەڵمانییەوە دابووی.
تەیموور بایندەر سەرۆكی یەكێتی ژووری هۆتێلەكانی توركیا بۆ ماڵپەڕی T24ـی توركی قسەی كردوە و دەڵێت: "ژمارەی گەشتیاری ئەڵمانی بۆ توركیا كەمی كردوە، بۆ نموونە پێشتر رۆژانە هەزار گەشتیاری ئەڵمانی رووی لە توركیا دەكرد، بەڵام لەم هەفتەیەدا ئەو ژمارەیە بۆ 300 تا 500 كەم بوەتەوە. بەڕاستی نەهاتنی گەشتیاری ئەڵمانی بۆ توركیا كاریگەری خراپی لەسەر كەرتی گەشتیاری و بازاڕ دەبێت".

سولەیمان سویلۆ چی گوتبوو؟
سولەیمان سویلو وەزیری ناوەخۆی توركیا، لە بەرواری 3_3_2019 لە ئەنكەرا وتارێكی پێشكەش كرد و لەوێدا هێرشی كردە سەر گەشتیاری ئەڵمانی.
ئەو گوتبووی: "لە ئەوروپا ئەڵمانەكان دەچن بەشداری كۆبوونەوە گەورەكانی تیرۆرستان دەكەن (كە مەبەستی لە پەكەكەپە)، پاشان دێنە بۆدروم و ئەنتاڵیا و موغلا كات بەسەر دەبەن. با بزانن ئێمە بۆ ئەوان ئامادەكاریمان كردوە و ئیدی با بێن بزانم دەتوانن لە فڕۆكەخانەكانی توركیادا بچنە دەرەوە؟ كارەكە ئەوەندە ئاسان نییە تۆ لە دەرەوە خاین بیت و پاشان بێیتە توركیا كەیف و سەفا بكەیت، بۆیە پێیان دەڵێم لەمەودوا هاتنتان بۆ توركیا ئەوەندە ئاسان نییە".
ئەم گوتەیەی سویلو گەشتیارە ئەڵمانەكانی ترساندوە، چونكە پێشتر توركیا چەندین هاووڵاتی ئەڵمانی دەستگیر كردبوو و تۆمەتی تیرۆری دابوونە پاڵ.
ساڵی پار ژمارەی گەشتیاری ئەڵمانی بۆ توركیا گەیشتە 4 ملیۆن و 500 هەزار، كە ئەمەش ژمارەیەكی زۆرە و، كاریگەری لەسەر ئابووری توركیا هەبوە. بەڵام پێشبینی دەكرێت بۆ ئەمساڵ گەشتیاری ئەڵمانی بایكۆتی توركیا بكەن و روو لە وڵاتانی تر بكەن بۆ كەیف و سەفا.

© 2017 Hawler