ئایار 21, 2019

ئەردۆغان دەیەوێت سەركردەیەكی تری ئۆپۆزسیۆنی توركیا بخاتە زیندانەوە

رەجەب تەییب ئەردۆغان هەڕەشەی توندی لە مەرال ئاكشەنەر سەرۆكی پارتی باش كرد، بەوەی تۆمەتی داوەتە پاڵ ئەردۆغان و بەرگری لە تیرۆرست دەكات، بۆیە دەیانخاتە ئەو شوێنەی كە ئەندام پەرلەمانەكانی هەدەپەی لێیە، كە مەبەستی زیندانە.

هەفتەی رابردوو مەرال ئاكشەنەر چوە شاری دەنیزلی و بۆ پروپاگندەی هەڵبژاردن وتارێكی پێشكەش كرد، لەوێدا بە هاووڵاتیانی گوت ئەردۆغان بە ئێوەی خۆشەویست دەڵێت تیرۆرست، ئایە ئێوە تیرۆرستن؟ بۆ وەڵامدانەوەی ئەو گوتانە، ئەردۆغان چوە ئیلازیخ و لەوێ وتارێكی پێشكەش كرد و جگە لە هەدەپە ئاكشەنریشی كردە ئامانج.
ئەردۆغان گوتی: "ئەو ئافرەتە تۆمەتی بۆ من دروست كردوە، با ببینێت كە ئەندام پەرلەمانەكانی هەدەپە لە كوێن و بە هۆی تۆمەت بەستنەوە بۆ سەرۆك كۆمار و پشتگیری لە تیرۆرست ئێستا لە كوێن؟ ئەویش دەچیتە ئەو شوێنە و دەبێت باجی ئەو قسانەی لە بەردەم دادگا بداتەوە".
مەرال ئاكشەنەر بە هۆی ئەوەی لە مەهەپە جیا بوەوە و پارتێكی تازەی بە ناوی پارتی باش دامەزراند، هەروەها دەوڵەت باخچەلی سەرۆكی مەهەپەش چوە پاڵ ئاكپارتی و هاوپەیمانی لەگەڵ بەست، بۆیە لەو رۆژەوە لە لایەك سەركردایەتی مەهەپە و لە لایەكی ترەوە ئاكپارتی بە چاوی دوژمن و تێكدەر دەڕواننە مەراڵ و پارتەكەی.
ئەگەر زۆرە دەوڵەت باخچەلی سەرۆكی مەهەپە، داوای لە ئەردۆغان كردبێت كە كۆتایی بە ژیانی سیاسی ئاكشەنەر بهێنێت، چونكە ئێستا پارتەكەی ئاكشەنەر بوەتە جێگرەوەی مەهەپە و وەكو پارتێكی ناسیۆنالیستی چوتە ناو خەڵك. تاكە رێگەش بۆ دەمكوتكردن و لاوازكردنی پارتی باش و ئاكشەنەر كردنەوەی دەرگای زیندانە و ئەردۆغانیش لەوروەوە هەوڵەكانی چڕ كردوەتەوە.
پارتی باش راگەیاندراوێكی بڵاوكردەوە و لەوێدا هێرش دەكاتە سەر ئەردۆغان و دەڵێت عەیبەیەكی گەورەیە بۆ توركیا سەرۆكەكەی بەو شێوەیە باس لە سەرۆكی پارتێكی سیاسی بكات. ئاماژەشیان داوە كە لە سنووری ئەردۆغان نییە بەو شێوەیە باس لە مەرال ئاكشەنەر بكات.
ئەوكاتەی 11 ئەندام پەرلەمانی هەدەپە دەستگیر كران، پارتی باش هیچ هەڵوێستێكی نەبوو و تەنانەت ئاكشەنەر بە پێویستیزانی ئەو ئەندام پەرلەمانانە دەستگیر بكرێن، بۆیە پێ ناچێت هەدەپە وەكو پارتێكی ئۆپۆزسیۆن هیچ هەڵوێستێكی بەرامبەر بە دەستگیركردنی ئاكشەنەر هەبێت، ئەگەر لە لایەن حكوومەتەوە دەستگیر بكرێت.
كاندیدی ئۆپۆزسیۆن لە ئیستەنبۆڵ بە پێش بیناڵی یڵدرم كەوتوە
هەڵبژاردنی شارەوانییەكان لە توركیا كەمتر لە مانگێكی ماوە، بۆیە دەزگاكانی راپرسی بازاڕیان گەرمە و هەر رۆژە و بە ئەنجامی راپرسییەكەوە دەبنە مانشێتی میدیاكان. دەزگای راپرسی ئەڤراسیا ئاشكرای دەكات لە ئیستەنبۆڵ كاندیدی ئۆپۆزسیۆن بە پێش كاندیدی ئاكپارتی كەوتوە.
ئەكرەم ئیمامئۆغلو كاندیدی جەهەپە بۆ سەرۆكی شارەوانی ئیستەنبۆڵ، توانیویەتی بە پێش بیناڵی یڵدرم كاندیدی ئاكپارتی بكەوێت.
كەمال ئۆزكیراز سەرۆكی دەزگای راپرسی ئەڤراسیای توركیا، لە پێگەی خۆی لە تویتەر نووسینێكی بڵاوكردوەتەوە و دەنووسێت: "بە گوێرەی ئەو راپرسییەی ئەنجاممان داوە، بیناڵی یڵدرم 48.5%ی دەنگەكان دەهێنێت لە ئیستەنبۆڵ، بەڵام ئەكرەم ئیمام ئۆغلو 50.1%ی دەنگەكان دەهێنێت، بەمەش كاندیدی ئۆپۆزسیۆن ئیستەنبۆڵ دەباتەوە".
ئۆزكیراز لە بەشێكی تری نووسینەكەیدا باس لە شاری ئەنكەرا دەكات، كە لەوێش كاندیدی جەهەپە مەنسوور یەڤاش بە پێش محەممەد ئۆزحەسەكی كاندیدی ئاكپارتی كەوتوە بە 6 پۆینت، واتە كاندیدی ئاكپارتی 45.6% و كاندیدی جەهەپەش 51.60%ی دەنگەكان دەهێنێـت.
پێشتریش رەجەب تەییب ئەردۆغان ئاماژەی دابوو كە بڕوای بە ئەنجامی دەزگاكانی راپرسی نییە لە توركیا.

© 2017 Hawler