تشرینی یەکەم 21, 2020

ئاكپارتی لە هەڵبژاردنی شارەوانییەكاندا بە جیاوازییەكی زۆر پایتەخت لە دەست دەدات

بەڕێوەبەری دەزگای راپرسی (ئەنار) لە توركیا كە دەزگایەكی گەورە و جێی متمانەیە، لە دیمانەیەكیدا ئاشكرای دەكات سیناریۆی هەڵبژاردنی شارەوانی 2009 بۆ ئاكپارتی دووبارە دەبێتەوە، كە بە جیاوازییەكی زۆر ئەنكەرا دەدۆڕێنێـت.

ئیبراهیم ئوسلو بەڕێوەبەری دەزگای راپرسی (ئەنار) لە توركیا، لە دیمانەیەكیدا لەگەڵ رۆژنامەی (بیرگون)ـی توركی هەڵسەنگاندنی بۆ هەڵبژاردنی شارەوانییەكانی توركیا كرد.
ئەو دەڵێت: "لە هەڵبژاردنی پێشووتردا ئاكپارتی توانی 44%ی دەنگەكان بهێنێت لە ئەنكەرا و سەرۆكی شارەوانی بردەوە، بەڵام بە هۆی ئەوەی هاوپەیمانی لەگەڵ مەهەپەدا بەستوە بۆ ئەم هەڵبژاردنە پێویستیشە 50+1 بە دەست بهێنێت، بۆیە ئەستەمە بتوانێت ئەمجارەیان شارەوانی ئەنكەرا بباتەوە".
ئوسلو پێی وایە سەرەكیترین هۆكار كە وا دەكات ئاكپارتی لە ئەنكەرا بدۆڕێت ئەو قەیرانە ئابوورییەیە كە دووچاری توركیا بوەتەوە و، دەڵێت قەیرانی دارایی ئاكپارتی لە دۆراندن نزیك دەكاتەوە.
ئەو لە بەشێكی تری قسەكانیدا ئاماژە دەدات ئەگەر ئەمجارەیان ئاكپارتی 44%ی دەنگەكانیش بهێنێتەوە هەر دووچاری شكست دەبێت، چونكە پێویستە 50+1 بە دەست بهێنێت، كە كاندیدی جەهەپە شانسی بردنەوەی زیاترە بە جیاوازییەكی زۆر.

 

كارزان گلی ـ هه‌ولێر

© 2017 Hawler