تشرینی یەکەم 21, 2020

بۆچوونی ولەنت ئارینجیش له‌سەر ئاكپارتی بخوێنه‌وه‌

بولەنت ئارینج سەركردەی دیاری ئاكپارتی و، هەروەها سەرۆكی پێشووی پەرلەمانی توركیا هێرش دەكاتە سەر ئاكپارتی و دەڵێت ستراتیژییەتی هەڵبژاردنتان هەڵەیە، چونكە لە توركیا شتێك نییە بە ناوی كێشەی هەمیشەیی و ئەوەتان لە كوێ هێناوە.

ئارینج لە كاتی بەشداریكردنی لە كۆنفراسێكدا لە ئەنكەرا، نزیكەی 50 خولەك قسەی كرد و ستراتیژیەتی هەڵبژاردنی ئاكپارتی پێ هەڵە بوو.
ئەو سەركردەیە ئەگەرچی لەناو ئاكپارتیدا دەركراوە و ئێستا هیچ پۆستێكی نییە، بەڵام بەردەوام گوتە و لێدوانەكانی جێی بایەخی میدیاكانی توركیایە.
ئارینج گلەیی لە ئاكپارتی دەكات، بەوەی لە هەڵبژاردنی شارەوانییەكاندا بۆ ئەنكەرا عەلی بابا جانی نەكردوەتە كاندیدی پارتەكەی، چونكە باباجان كەسایەتییەكی دیار و لێهاتوو و شارەزایە لە بوارەكەی خۆیدا، بۆیە بە هەموو پێوەرێك ئەو شاییستەی كاندیدبوون بوە.
ئەو گوتی: "لە ئەنكەرا عەلە باباجان زۆر خۆشەویستە، لە خەڵكم پرسیوە پێتان باشە كێ ببێتە سەرۆكی شارەوانی شارەكەتان، لە هەر 10 هاووڵاتییەك 8یان داوای عەلە باباجانیان كردوە. باشە مادام نایكەیتە كاندیدی پارتەكەت، پێویستە رێگە بدەیت باباجان لەگەڵ كاندیدی ئاكپارتی بۆ ئەنكەرا پروپاگندەی هەڵبژاردن بكات، كە ئەمەش لە بەرژەوەندی ئاكپارتییە".
ئارینج لە بەشێكی تری قسەكانیدا رەخنە لە رەجەب تەییب ئەردۆغان و چەند سەركردەیەكی ئاكپارتی دەگرێت، كاتێك باس لە بوونی كێشەی هەمیشەیی دەكەن لە توركیا و، پێیوایە لە توركیا شتێك نییە بە ناوی كێشەی هەمیشەیی، بۆیە ستراتیژییەتی ئاكپارتی بۆ ئەم هەڵبژاردنەی پێ هەڵەیە.
بولەنت ئارینج یەكەم سەرۆكی پەرلەمان بوە لە سەردەمی ئاكپارتی لە ساڵی 2003ـدا، هەروەها پۆستی وتەبێژی حكوومەت و جێگری سەرۆك وەزیرانیشی وەرگرتوە، بەڵام كاتێك رەخنەی لە رەجەب تەییب ئەردۆغان گرد لەبارەی پرسی چارەسەرییەوە، بۆیە ئەردۆغان لە پۆستی حیزبی و حكوومی دووری خستەوە.
دەنگۆیەكی بەهێز هەیە، كە ئارینج خۆی بداتە پاڵ ئەحمەد داودئۆغلو و لەو پارتە تازەیەی بە نیازە دایبمەزرێنێت ئارینجیش ببێتە یەكێك لە دامەزرێنەرانی ئەو پارتە، بۆیە لە ئێستاوە رەخنە لە ئاكپارتی دەگرێت و بە شێوەیەكی ناڕاستەوخۆش باس لە كۆتایی هاتنی سەردەمی ئاكپارتی دەكات لە توركیا.
ئارینج هەر لەو كۆنفراسەدا هێرشی كردە سەر كاندیدی ئاكپارتی بۆ سەرۆكی شارەوانی ئیزمیر و گوتی چۆن دەبێت لە پروپاگندەی هەڵبژاردندا باس لە شەراب بكات.
پێشتر نیهاد زەیبەكچی كاندیدی ئاكپارتی بۆ هەڵبژاردنی شارەوانییەكان لەسەر بازنەی ئیزمیر گوتبووی: "گرنگی بە شەرابی ئیزمیر دەدەین و لە داهاتوودا دەركردەی دەرەوەی وڵاتی دەكەین تا سوودی بۆ وڵاتەكەمان هەبێت". ئارینج رەخنەی لێ دەگرێت و دەڵێت چۆن دەبێت كاندیدی ئاكپارتی بەڵێنی لەو شێوەیە بدات، ئەمەش هەر هەڵەیەكی تری ستراتیژی هەڵبژاردنە لە لایەن ئاكپارتییەوە.
بڕیارە لە 31_3_2019 هەڵبژارنی شارەوانییەكان لە توركیا ئەنجام بدرێت، بە گوێرەی زانیارییەكانیش بێت لە ئیستەنبۆڵ و ئەنكەرا كێبڕكێ لە نێوان ئاكپارتی و جەهەپە توندە، چونكە دەزگاكانی راپرسی ئاشكرای دەكەن لەو 2 شارەدا، كاندیدی هەردوو پارت زۆر بەهێزن و ئەگەر زۆریشە لەو 2 شارە كاندیدی جەهەپە بە پێش كاندیدی ئاكپارتی بكەوێت.
بۆیە ئەردۆغان لە میتینگەكانیدا جگە لەوەی هێرشی توند دەكاتە سەر هەدەپە، لە هەمان كاتدا هێرشی توندتر دەكاتە سەر جەهەپە و بە لایەنگری پەكەكە و فەتحوڵڵا گولەن ناویان دەبات.

© 2017 Hawler